भक्तपुर, ३० असार २०७९नेकपा (एकीकृत समाजवादी) का उपमहासचिव जगन्नाथ खतिवडाले पूर्व अर्थमन्त्री जनार्दन शर्माप्रति लक्षित गर्दै सीसीटीभी क्यामेराका धेरै फुटेजहरू हराएर देशलाई कमजोर बनाएको बताएका छन् ।
आज बिहीवार ललितपुरमा आयोजित नेपालमा विज्ञान तथा सूचना प्रविधि सम्बन्धित नीति संवाद कार्यक्रममा बोल्दै उनले सीसीटीभी विज्ञानको एउटा प्रकरण भएको र त्यही प्रकरणअन्तर्गत सीसीटीभीको फुटेज हराएर देशलाई झनै कमजोर बनाइरहेको बताए । उनले सुशासन र पारदर्शिता विज्ञानलाई छलेर सम्भव नरहेको भन्दै विज्ञानलाई स्वीकार्न सकेमात्रै लक्ष्यमा पुग्ने धारणा राखेका छन् ।
उनले भने, ‘विज्ञान प्रविधिबाट हामी पछि परेका छौँ । चिन्तन र जीवनशैलीमा क्रान्ति ल्याउनका लागि समाज परिवर्तन गर्न विज्ञानको प्रयोग गर्ने सम्पूर्ण आयामहरू तय गर्नसक्ने नीतिहरू बनाऔँ । जिन्दगीमा धेरै फुटेजहरू हमीले हराउँदै–हराउँदै गएका छौँ र आफूलाई कमजोर पारेका छौँ । सुशासन र पारदर्शिता विज्ञानलाई छलेर सम्भव छैन ।
उपमहासचिव खतिवडाले फरक प्रसङ्गमा नेपालको दक्षिण, पूर्व, पश्चिमको सीमाना यही हो, भन्दै नेकपा (माओवादी केन्द्र) का अध्यक्ष पुष्पकमल दाहाललाई प्रश्न गरेका छन् । उनले भने, ‘पुष्पकमल दाहाल कमरेडलाई सोधौँ । नेपालको दक्षिण, पूर्व, पश्चिमको सीमाना मेरो यहीँ हो भन्ने थाहा छ छैन । भारतले मिच्दै–मिच्दै यो छेउसम्म मेरो भन्छ, नेपालले यो ठाउँमा भन्छ र प्रतिवाद गर्न सक्दैन । सम्भवतः एक सय २३ वटा स्ट्रिप नक्सा तयार गरिएको छ ।