भक्तपुर, २१ कार्तिक २०७९बागमती प्रदेशका स्वास्थ्य मन्त्री निमा लामाले आफ्नो कार्यकालमा आयुर्वेद स्वास्थ्य तर्फ ३ गुणा बजेट बढाएको बताएका छन् । आफूले आयुर्वेद चिकित्सालाई प्राथमिकता दिएर बजेट तीन गुणाले बढाइदिएको उनले बताएका हुन् ।
बागमती प्रदेश स्तरीय समिक्षा गोष्टीलाई भक्तपुरमा सम्बोधन गर्दै मन्त्री लामाले प्रदेशका जिल्लास्थित आयुर्वेद स्वास्थ्य केन्द्रहरुमा प्राविधिक जनशक्ति अभावको समस्या समाधान गर्न ७ सय कर्मचारी भर्ना गरी सेवा लाई प्रभावकारी पारिएको समेत जानकारी गराए । आयुर्वेद चिकित्सा पद्दती प्राकृतिक र मौलिक भएको भन्दै उनले अन्तत: मानिसहरु आयुर्वेद चिकित्सामै फर्कने बिश्वास व्यक्त गरे । त्यसका लागि आयुर्वेदका सुविधा सम्पन्न प्रदेश अस्पताल बनाउने र आफ्नै औषधी उद्योग खोल्ने कामलाई प्राथमिकता पूर्वक अघि बढाइको समेत उनले उल्लेख गरे । आयुर्वेदको बिकासको आवश्यकता आफूले राम्ररी बुझेको बताउदै उनले यसको बिकासमा थप योगदान गर्ने समेत प्रतिवद्धता प्रकट गरे ।
उक्त अवसरमा प्रदेश सचिव बद्रीबहादुर खड्काले गोष्टीले निकाल्ने निष्कर्षले आयुर्वेद विकासको नीति र योजना तथा कार्यक्रम निर्धारणमा योगदान हुने विश्वास व्यक्त गरे । कार्यक्रममा जिल्ला स्थित कार्यालयहरुले आफ्ना कार्यक्रम र उपलब्धीबारे प्रस्तुतीकरण गरेका थिए । त्यसको मूल्यांकन संयन्त्र बनाएर प्रदेशले उत्कृष्ट लाई सम्मान समेत गरेको थियो । उक्त मूल्यांकन प्रक्रिया सातै प्रदेश मध्ये बागमतीले पहिलो शुरुवात गरेको बताइएको छ ।
आयुर्वेद स्वास्थ्य कार्यक्रमको वार्षिक समिक्षा गोष्टि भक्तपुर घोषणा पत्र जारी गर्दै सम्पन्न भएको समेत आयोजक बागमती प्रदेशको स्वास्थ्य निर्देशानालयका निर्देशक महेश्वर श्रेष्ठले जानकारी गराएका छन् । बागमती प्रदेश अन्तर्गतका सबै जिल्ला र पालिकाका प्रतिनिधि सम्मिलित २ दिने गोष्टि भक्तपुरस्थित सिद्धि स्मृती प्रतिष्ठानको सभाहलमा सोमबार सम्पन्न भएको हो ।
