भक्तपुर, २१ मङ्सिर २०७९भक्तपुरको सूर्यविनायक-५ कटुञ्जेस्थित सुवर्णेश्वर मन्दिर परिसरमा १ सय ८ शिवलिङ्ग र सप्तऋषिको स्थापना गरिएको छ । नगरप्रमुख बासुदेव थापाले बुधवार यस धार्मिक निर्माणको उद्घाटन गरेका छन् ।
स्थानीय बाबुकाजी कसपालले आफ्नो पितृजनको सम्झनामा १ सय ८ शिवलिङ्ग र सप्तऋषिको स्थापना गरेका हुन् । शिक्षासेवीको रुपमा परिचित कसपाल मोर्डन स्कूल र कलेजका संस्थापक हुन् । १ सय ८ शिवलिङ्ग, सप्तऋषिसहित यसको निर्माण र प्राण प्रतिस्ठा कार्यमा लाग्ने सम्पूर्ण खर्च बाबुकाजी कसपालले ब्यहोरेका स्वर्गद्वारी सन्यास आश्रम सुवर्णेश्वरका अध्यक्ष मुकुन्दप्रसाद लुइँटेलले बताए ।
मन्दिर परिसरमा १ सय ८ शिवलिङ्ग स्थापना गरी पूजन गर्ने कार्यका लागि मंगलबार पूर्वाङ्ग यज्ञादी र बुधबार प्राण प्रतिष्ठा रूद्री पूजन एवं लाखबत्ती प्रज्वलन गरिएको बाबुकाजी कसपालका जेठा छोरा अनिल कसपालले जानकारी गराए । शिवलिङ्गलाई शिवालयको मूख्य आकर्षण मानिन्छ । यो पूरै ब्रह्माण्डमा फैलिएको स्तम्भको रुपमा स्वयं शिव स्वरुपले पुजित छ । यसको पुजनले शिव प्रसन्न हुने र शिवभक्तलाई फल प्राप्त हुने कस्पाल परिवारले विश्वास ब्यक्त गरेको छ ।