भक्तपुर, १७ पुस २०७९ चर्चित पर्यटकीय स्थल भेडेटारमा तीन दिने दसौं परिकार महोत्सव सुरु भएको छ । होटेल एसोसिएसन भेडेटारले पर्यटक भित्राउने उद्देश्य सहित अङ्ग्रेजी नयाँ वर्ष २०२३ लाई लक्षित गरी दशौँ खाना महोत्सव आयोजना गरेको हो ।
महोत्सवको मुख्य आकर्षणमा स्थानीय खानाका परिकार, स्थानीय अर्ग्यानिक खेतीबाट उत्पादित तरकारी तथा फलफूलको प्रदर्शनी, हस्तकला, कृषि तथा घरेलु सामग्रीहरू रहेका छन् । महोत्सवमा आउने आगन्तुकहरूलाई प्याराग्लाइडिङ, माउन्टेन बाइक र टुर प्याकेजको व्यवस्था गरिएको आयोजकले जनाएको छ ।
होटेल एसोसिएसन भेडेटारको अध्यक्ष शान्ति लिम्बूका अनुसार महोत्सवमा ३० हजार आन्तरिक तथा बाह्य पर्यटक आउने र एक करोड रुपैयाँ बराबरको आर्थिक कारोबार गर्ने लक्ष्य राखिएको छ ।
महोत्सवमा आउने पर्यटकलाई साँगुरीगढी गाउँपालिकाभित्र रहेको ऐतिहासिक स्थल साँगुरीगढी, पाथीभरा मन्दिर, शंखेश्वर महादेवको मन्दिर, नाम्जे, नमस्ते झर्ना, शैलुङडाँडा, आत्मा बस्ने घर थुम्की, बौद्धविहार गुम्बा, ध्वजेडाँडा अजङ्गको वरको रूखघुमाइने जनाइएको छ । २०६८ सालबाट सुरु गरिएको सो महोत्सवमा स्वदेशी मात्र नभई विदेशी पर्यटक समेत रहेको आयोजकले जनाएको छ ।