भक्तपुर, २८ पुस २०७९ ओखलढुंगामा आमा गुमाएको बच्चालाई दुध खानको लागी दुहुनो गाई उपहार दिएको छ । सिद्धिचरण नगरपालिका १ नं. वडा कार्यालय तलुवा मुलघाटकी २० वर्षीय कल्पना भुजेलको पुस २० गते निधन भएपछि कार्यालयले उसको बच्चालाई गाई उपहार दिएको हो ।
७ महिने छोरा मावली हजुरआमा सँग भएको र दुध खानको लागी कुनै उपाय नभएपछि वडा कार्यालयको १५ हजार र वडाअध्यक्ष तिर्थ घिमिरेको ब्यक्तिगत ५ हजार गरी जम्मा २० हजारको दुहुनो गाई दिइएको अध्यक्ष तिर्थ घिमिरेले बताए । नगरपालिकाको तर्फ बाट पनि रु १० हजार नगद सहित पोषीलो खानेकुरा दिएको बताएका छन् ।
सामान्य परिवार भएकाले बच्चालाई पालन पोषण गर्न समस्या नहोस भनेर सहयोग गरेको मेयर तेजेन्द्र खनालले बताए । कलिलै उमेरमा च्यानमका कैलास कटवाल सँग भागी विवाह गरेकी कल्पनाले २० वर्षकै उमेरमा गत जेठमा छोरो जन्माएकी थिईन । बच्चा जन्मे पछि श्रीमान (प्रकास) ले वास्ता गर्न छोडेका थिए । श्रीमानले छोडेपछि दुधे बालक सहित काठमाडौँमा ज्यामी काम गर्दै बसेको माइती परिवार श्रोतले जनाएको छ ।
गत मंसिर २२ गते काठमाडौँबाट तलुवा माईतिमा आएकी कल्पनाको पुस २० गते सामुदायिक अस्पताल मिसन सोब्रुमा कल्पनाको निधन भएको थियो । सुत्केरी भएको समयमा हेरचाह नभएको र खाना पनि नपाएका कारण कुपोषणले निधन भएको माइति परिवारले बताएका छन् ।