भक्तपुर, ६ चैत २०७९प्रधानमन्त्री पुष्पकमल दाहाल प्रचण्डले शुक्रबार सम्म मन्त्रीपरिषद बिस्तार गर्ने भएका छन् । बिश्वासको मत पाएपछि उनले सोकुरा सार्वजनिक गरेका हुन् ।
सोमवार प्रतिनिधि सभामा विश्वासको मत पाएपछि प्रधानमन्त्री प्रचण्डले सञ्चारकर्मीसंग कुरा गर्दै २/४ दिनभित्रै सरकारलाई पूर्णता दिने प्रष्ट पारे । उनले मङ्गलवार बिहानदेखि नै सत्ता साझेदार दलहरुसंग छलफल सुरु गर्ने पनि जानकारी गराए ।
गठबन्धनमा रहेका सबै दलसँग बसेर २/४ दिनभित्रमै मन्त्री टुङ्ग्याउने अनि काम गर्ने उनले बताएका छन् ।
एउटै कार्यकालमा सोमवार सङ्घीय संसद प्रतिनिधि सभाबाट उनले दोस्रो पटक विश्वासको मत पाएका हुन् । बैठकमा २ सय ६२ सांसद उपस्थित भएकामा १ सय ७२ जनाले प्रधानमन्त्रीलाई विश्वासको मत दिएका छन् । ८९ सांसदले यस प्रस्तावको विपक्षमा मत दिँए भने नेमकिपाका १ जना सांसद तटस्थ रहे ।
यस अघि बिश्वासको मत दिएका नेकपा एमाले र राष्ट्रिय प्रजातन्त्र पार्टीले समर्थन फिर्ता लिएपछि प्रधानमन्त्रीले संवैधानिक व्यवस्थाअनुसार पुन: विश्वासको मत लिएका हुन् ।