उपप्रधान एवं गृहमन्त्री नारायणकाजी श्रेष्ठले नक्कली भुटानी शरणार्थी प्रकरण देशलाई बेइज्जत गर्नेगरी राज्य विरुद्ध गरिएको अपराध भएको भनेका छन् । आफ्नै नागरिकलाई नक्कली शरणार्थी बनाइ बेच्ने गिरोहमा संलग्न देखिएका सबैलाई कारवाही गर्ने समेत उनको भनाइ छ ।

आइतवार प्रेस सेन्टर नेपालका प्रतिनिधिहरुहरु संग सिंहदरवारमा अन्तरक्रिया गर्दै उनले निर्दोष नपर्ने र दोषी उम्कन नसक्ने जिकिर गरे । नेकपा(माओवादी केन्द्र)का बरिष्ठ उपाध्यक्ष समेत रहेका उपप्रधान एवं गृह मन्त्री श्रेष्ठले यो गिरोहमा आफ्नै पार्टीका परेपनि नछाडिने प्रतिवद्धता पनि प्रकट गरेका छन् । ” देशको बेइज्जत गर्नेहरु कुनै पार्टीका पनि हुदैनन्, यस्ता भ्रष्ट र देशद्रोही जोकोही भएपनि कारवाहीबाट उम्किन सक्दैन ।” उनले भने ।

आफूलाई प्रधानमन्त्री प्रचण्डको दरिलो साथ र निर्देशन प्राप्त भएको भन्दै उनले भ्रष्टाचार र कमिसनको नेक्सस तोडेर नै छोड्ने उद्घोष समेत गरे । ” देशमा सुशासन र सम्वृद्धिको बाधक बनेका कमिसन र भ्रष्टाचारका नेक्सस पूरै तोड्छौ ।” उनी दृढ देखिए ।

आफूले प्रहरीलाई निर्धक्क अनुसन्धान गर्न र प्रमाण बमोजिम कानुनी कारवाही अघि बढाउँन निर्देशन दिएको उल्लेख गर्दै उनले राजनीतिक दबाब र प्रभावमा प्रहरी नरहेको प्रष्ट पारे ।

आइतवार नै प्रहरीले पूर्व उपप्रधानमन्त्री टोपबहादुर रायमाझीलाई पक्राउ गरेको छ । यसअघि प्रहरीले पूर्वगृहमन्त्री बालकृष्ण खाँणसँगै १२ जनालाई पक्राउ गरिसकेको छ । अनुसन्धान अघि बढ्दै जादा ठुला नेताहरु मुछिएपछि सरकारले अनुसन्धानलाई अझ महत्वका साथ् अघि बढाएको उपप्रधान एवं गृह मन्त्री श्रेष्ठले जनाएका छन् ।

ठुला नेताहरु अनुसन्धानका दायरामा आए संगै जनतामा सरकारप्रति भरोषा र अनुसन्धान प्रति बिश्वास बढ्दै गएको छ । उपप्रधान एवं गृह मन्त्री नारायणकाजी श्रेष्ठको राजनीतिक कद यसले अझ उँचो बनाएको देखिन्छ । उक्त अवसरमा प्रेस सेन्टर नेपालका इन्चार्ज महेश्वर दाहाल, अध्यक्ष बिष्णु सापकोटा जुगल लगायत उपस्थित पत्रकारले गृहको पछिल्लो कदमले जनतामा आशा र भरोषा जागृत भएको भन्दै सम्पूर्ण  देशभक्त जनताहरुको समर्थन देखिएकाले अनुसन्धान पूर्ण सफल रहने बिश्वास व्यक्त गरेका थिए । अन्तरक्रियामा नक्कली भुटानी शरणार्थीको विषयमा मात्र नभई आफैले पाउने सुराकी खर्च खारेजी देखि तत्कालीन गृह मन्त्री रवि लामिछानेले स्वीकृत गरेका देशघाती कार्यविधिको खारेजी र सामन्तबादको भद्दा अवशेषका रुपमा रहेको मिटर ब्याजी साहुहरुलाई कार्वाही तथा पीडितलाई न्याय दिन बनाइएको प्रभावकारी आयोगको प्रेस सेन्टरका पत्रकारहरुले खुलेर प्रशंंसा गरेका र थप केही सुझाव समेत दिएका उपप्रधान एवं गृहमन्त्री नारायणकाजी श्रेष्ठका प्रेस सल्लाहकार कमल गिरीले जानकारी गराएका छन् ।