संजीप शुभचिन्तक, भक्तपुर । भक्तपुरको भक्तपुर-१ सल्लाघारीस्थित १०८ रोपनी खुला मैदान हजारौं मानिसले भरिभराउ भएको छ । देशविदेशबाट १५ हजार बढी मानिसहरु आध्यात्मिक साधनाका लागि मैदानमा भेला भएका छन् ।

सदगुरु सुदीक्षा जी महाराजको सानिध्यतामा शनिवारबाट शुरु हुने दुई दिने ‘२३ औं निरंकारी सन्त समागम’ मा सरिक हुन मानिसहरु भेला भएपछि खुला चौरमा बेग्लौ रौनक बढेको छ । आयोजक सन्त निरंकारी मण्डल नेपालले १५ हजार बढी मानिसका लागि खानेबस्ने व्यवस्था मैदानमै मिलाएको छ भने त्यत्रो भीडका बाबजुद त्यहाँ कुनै कोलाहल भने छैन ।

समागममा सदगुरु सुदीक्षा जी महाराजप्रतिको आकर्षण नै प्रमुख देखिएको छ । सहभागीहरु उनको सानिध्यमा रहन घन्टौंको यात्रा तय गरेर सल्लाघारी आइपुगेका छन् ।

के हो निरंकारी सन्त समागम
आयोजक सन्त निरंकारी मण्डल नेपालले शुक्रवार पत्रकार सम्मेलन गर्दै निरंकारी सन्त समागम सत्य, प्रेम र एकताको अभियान भएको बताएको छ । यो कुनै धर्म वा सम्प्रदाय नभई आध्यात्मिक विचारधारा भएको सन्त निरंकारी मिशनका बिदेश बिभागका अध्यक्ष विनोद भोहराजीले बताएका छन् । यसले कुनै विशेष धर्मग्रन्थको नभई सबै धर्मगन्थको मूलसार समेट्ने उनको भनाइ छ ।
“सन्त निरंकारी मिशनले विभिन्न विचारधाराहरुमा आस्था राख्ने संसारका सबै मानवहरुको सम्मान गर्दछ । निराकार परमात्मालाई जान्नु नै मानव जीवनको मूल उद्देश्य हो,” उनले भने ।

के हुन्छ दुई दिन
सदगुरु सुदीक्षा जी महाराजको प्रवचन नै दुई दिने कार्यक्रमको प्रमुख आकर्षण भएको आयोजक समितिका अध्यक्ष नर बहादुर रावलको भनाइ छ । जिज्ञासु आत्मा(व्यक्ति) लाई परमात्मा(ईश्वर) को अनुभुती गराउने सामर्थ्यवान सदगुरु सुदीक्षा जी महाराजले दुई दिन सहभागी सन्तहरुलाई कृपा दृष्टि प्रदान गर्ने र तत्वबोध गराउने बताइन्छ । सदगुरुको कृपाले सर्वव्यापी इश्वरको अनुभूति हुने र मानव जीवन सरल र सुखी हुँदै मुक्तिको मार्ग प्राप्ति हुने बिश्वास श्रद्धालुहरुमा देखिन्छ ।

कस्तो छ व्यवस्थापन
कार्यक्रमका लागि १ हजार २ सय जना स्वयंसेवक खटाइएका काठमाडौं क्षेत्रीय संचालकको पद पाएका स्वयंसेवक बाबुराज महर्जनले बताएका छन् । कार्यक्रममा ९ हजार भारतीय र ६ हजार नेपालीका लागि चौरमै खानेबस्ने व्यवस्था गरिएको उनले जनाएका छन् । उपस्थित संख्या थपिएमा नजिकैका ३ वटा पार्टी प्यालेसमा राख्न आवश्यक समन्वय गरिएको उनले जानकारी गराए ।

उपस्थित सबैलाई निःशुल्क एकैनासको खानेबस्ने व्यवस्था मिलाइएको र इच्छा अनुसारको भोजन खोज्नेहरुका लागि सुलभ मूल्यमा क्यान्टिन समेत संचालन गरिएको महर्जनले बताएका छन् । १०८ रोपनीमा ५ सय वटा अस्थायी सार्वजनिक शैचालय समेत व्यवस्था गरिएको महर्जनले बताए ।

सदस्यको सहयोगमै व्यवस्थापनको खर्च
सांसद समेत रहेकी संस्थाकी सदस्य रन्जु झाले सन्त समागम सदस्यहरुको आपसी सहयोगमा सम्पन्न हुने बताएकी छन् । कसैसंग मागेर नभई सदस्यहरुकै स्वेच्छिक सहयोगबाट व्यवस्थापन खर्च संकलन गरिएको उनले जानकारी गराइन । कार्यक्रममा उपस्थित हुनेहरु स्वेच्छाले आफ्नै खर्चमा आएको र कार्यक्रम पनि कतैको फन्डिङमा नभइ स्वेच्छिक दानबाट सञ्चालन हुने आयोजकको दावी छ।

पत्रकार सम्मेलनमा प्रेस संयोजक विमल सिंहले कार्यक्रमबारे प्रेस जगतले सत्यतथ्य जानकारी गराई सभ्य र भव्य रुपमा सम्पन्न गर्न सहयोग गर्ने बिश्वास व्यक्त गरिन् ।

नेपालमा निरंकारी मिसन
सन् १९२९ मा अहिलेको पाकिस्तानमा पर्ने शहर पेशावरमा सन्त निरंकारी मिसनको स्थापना भएको थियो । बाबा बुटासिंह जी महाराजले स्थापना गरेको यो मिसनमा उनको निधनपछि नेतृत्व गरेका बाबा अवतार सिंह महाराजले भारत विभाजनको बेला मिसनको केन्द्र सारेर पेशावर बाट दिल्ली ल्याए । मिसनको नेतृत्वको दायित्व हस्तान्तरण हुँदै जादा सन् २०१८ देखि सदगुरु सुदीक्षा जी महाराजको हातमा मिसन संचालनको दायित्व रहेको छ ।

१ सय भन्दा बढी देशमा विभिन्न नामबाट रहेको सन्त निरंकारी मिसनको नेपालका ३९ जिल्लामा १ सय २५ सत्संग भवन रहेका नेपाल अध्यक्ष नरबहादुर रावलले बताएका छन् । बि.स. २०२० सालमै अछामको गोयालापानीबाट मिसनले ज्ञान दिन शुरु गरेको बताईएपनि धेरैका लागि सन्त निरंकारी मिसन नौलो नै रहेको देखिन्छ । यसका सदस्यहरु नेपालमा ५० हजारको हाराहारीमा मात्र रहेका छन् । बिश्वबन्धुत्व र भाइचारालाई मिसनले जोड दिएको बताइन्छ ।