भक्तपुर, २८ असार २०८१प्रधानमन्त्री पुष्पकमल दाहाल प्रचण्डले पश्चगमनका लागि संविधान संशोधन स्वीकार्य नहुने बताएका छन् । अग्रगमनका लागि संविधान संशोधन गर्न सकिने उनको सुझाव छ ।
संविधान संशोधन गर्ने भए खुला छलफल गरेर कार्यकारी राष्ट्रपतिमा जान उनले प्रस्ताव गरे ।
प्रतिनिधि सभामा विश्वासको मत सम्बन्धि प्रस्ताव पेश गर्दै उनले संविधान संशोधन नै गर्ने हो भने कार्यकारी राष्ट्रपति प्रणालीमा जान आग्रह गरेका हुन् । उनले महिला, दलित, आदीवासी, अपसंख्यक र सीमान्तकृत जनताको प्रतिनिधित्व हुँदा संसद अपवित्र हुने भन्ठान्ने दलहरुलाई जनताले आफ्नो तागत देखाइदिने पनि दावी गरे ।
प्रधानमन्त्री प्रचण्डले राष्ट्रिय सभाको सबै भन्दा ठुलो दल माओवादी केन्द्र बिना संबिधान संशोधन कसरी गर्नुहुन्छ भन्दै प्रश्न पनि गरेका छन् ।
प्रधानमन्त्री पुष्पकमल दाहाल ‘प्रचण्ड’ले संविधान संशोधनजस्तो जटिल र संवेदनशील विषयमा खेलवाड नगर्नु आग्रह गरे । समावेशीतालाई खारेज गर्ने मनासायले नयाँ गठबन्धन बनेको उल्लेख गर्दै उनले सम्पूर्ण महिला, दलित, जनजाति, मधेसी, अल्प संख्यकलाई सम्मान गर्नेगरी संविधान संशोधन गर्न प्रस्ताव गरे ।
प्रतिनिधिसभाबाट आज विश्वासको मत लिने क्रममा प्रधानमन्त्री प्रचण्डले प्रतिवाद र प्रतिरोधको पहल भएको स्पष्ट पारे । उनले भने, “साथीहरूलाई मेरो विनम्र प्रश्न छ, संविधान संशोधनजस्तो जटिल र संवेदनशील विषयमा यस्तै तरिकाले हुन्छ छलफल ? त्यो तरिकाले पाउँछ जनताको स्वीकार्यता ? राष्ट्रिय सभाको सबैभन्दा ठूलो दल माओवादी केन्द्रलाई किनारा लगाएर सम्भव छ संविधान संशोधन ?”