भक्तपुर, २९ साउन २०८१पूर्वराष्ट्रपति विद्यादेवी भण्डारीले केदारनाथको शिर डोलेश्वरको दर्शन गरेकी छन् । मंगलवार उनले डोलेश्वर महादेवको दर्शन गरेकी हुन् ।
भक्तपुरको सूर्यविनायक-८ सिपाडोलस्थित प्रसिद्ध डोलेश्वर मन्दिर पुगेकी पूर्वराष्ट्रपति भण्डारीले पूजाअर्चना, आरती र आराधना गरेकी सूर्यविनायक-८ का वडाध्यक्ष पुष्पराज बस्नेतले बताए ।
सो अवसरमा पूर्वराष्ट्रपतिको स्वागतका लागि सूर्यविनायक नगरपालिकाका प्रमुख वासुदेव थापा र उपप्रमुख सरिता तिम्सिना भट्टराईसहित नगरपालिकाका जनप्रतिनिधिहरु एवं नेकपा (एमाले) भक्तपुरका जिल्ला अध्यक्ष बचन देउजा, मन्दिर व्यवस्थापन समितिका पदाधिकारी लगायतको उपस्थिति रहेको थियो । उनीहरुले पूर्वराष्ट्रपति भण्डारीलाई डोलेश्वरको महिमाबारे बताउदै मन्दिर संरचनाको समेत अवलोकन गराएका थिए ।
प्रसिद्ध डोलेश्वर मन्दिरसंगै पूर्वराष्ट्रपति भण्डारीले सूर्यविनायक नगरपालिकाको कार्यालय पुगेर नगर नेतृत्वलाई जनपक्षीय काममा दत्तचित्त भएर लाग्न अभिप्रेरित गरेकी छन् । सूर्यविनायक नगरपालिकाका प्रमुख बासुदेव थापा नेकपा(एमाले) भित्र पूर्वराष्ट्रपति भण्डारीको संरक्षणमा रहेका छन् । उनकै बलमा थापाले उम्मेद्वारी पाएको र नगर प्रमुख दोहोरिन सफल भएको एमाले वृत्तमा चर्चा रहेको छ ।
सूर्यविनायक-५ कटुन्जेस्थित नगर कार्यपाकिकाको कार्यालयमा पुगेकी पूर्व राष्ट्रपति भण्डारीले स्थानीय सरकारले जनतासंग सुमधुर सम्बन्ध बनाएर सुख, शान्ति र सम्बृद्धि दिनसक्नुपर्नेमा जोड दिएकी छन् । जन भावनालाई केन्द्रमा राखी विकासका कार्यलाई अघि बढाउन उनले सुझाव समेत दिईन्।
भौतिक विकास मात्रै नभई सामाजिक विकास र दिगो आर्थिक बिकासको लक्ष्य हासिल गर्ने गरि अगाडि बढ्नुपर्ने उनले बताइन । स्थानीय श्रोत र साधनको प्रयोग एवं सम्पदा र मौलिकताको संरक्षण एवं सम्वर्द्धन गर्दै अघि बढ्न उनले प्रेरित गरिन् ।
सो अवसरमा नगर प्रमुख वासुदेव थापाले नगरपालिकाको समग्र बिकासको बारेमा जानकारी गराउनुका साथै नगरपालिकाको अवलोकन गरी मार्गनिर्देशन गरेकोमा आभार प्रकट गरेका थिए । पूर्व राष्ट्रपति भण्डारीलाई नगरपालिकाका प्रमुख थापा, उपप्रमुख सरिता तिम्सिना भट्टराई, प्रमुख प्रशासकीय अधिकृत तारानाथ लुइँटेल लगायत नगरकार्यपालिकाका पदाधिकारी एवं कर्मचारीले स्वागत गरेका थिए ।
नेकपा एमालेका नेता एवं सूर्यविनायकका मेयर बासुदेव थापाको आतिथ्यतामा भक्तपुर आएकी पूर्वराष्ट्रपति भण्डारीको स्वागतमा एमालेका जिल्ला इन्चार्ज महेश बस्नेत भने आएनन । डोलेश्वर र नगरपालिका दुवै स्थानमा पूर्व मन्त्री एवं नेकपा(एमाले)का जिल्ला इन्चार्ज महेश बस्नेत भने अनुपस्थित देखिए । भक्तपुरमा मेयर थापा र जिल्ला इन्चार्ज बस्नेतबीचको सम्बन्ध अझै मिठासपूर्ण बन्न सकेको छैन ।