भक्तपुर, ७ भदौ २०८१सूर्यविनायक नगरपालिकाका प्रमुख बासुदेव थापाले १ रुपैयाँको भष्टाचार प्रमाणित गर्नेलाई १ लाख रुपैयाँ पुरस्कार प्रदान गर्ने बताएका छन् । आफूले भ्रष्टाचार नगर्ने र गर्न पनि नदिने जिकिर गर्दै उनले सोकुरा बताएका हुन् ।
श्रावणी मेला समापन कार्यक्रममा बिहीवार डोलेश्वर महादेवको अगाडी उभिएर उनले भने, ”मैले एक रुपैयाँ मात्र पनि भ्रष्टाचार गरेको प्रमाण ल्याउनुस, एक लाख रुपैयाँ पुरस्कार दिन्छु ।” आफू किसानको छोरा भएको र खानपुग्ने जग्गाजमिन रहेको भन्दै भ्रष्टाचार गर्नु नपर्ने उनको भनाइ छ । ”मेरो ३ जनाको परिवारमा छोरा अमेरिकामा सरकारी जागिरे छ, हामी दुई बुढाबुढीलाई भ्रष्टाचार गरेर खानुपर्ने अवस्था छैन ।” उनले भने ।
काम नपाएका अल्छीहरुले सामाजिक संजालमा सूर्यविनायकमा भ्रष्टाचार छ भन्दै काम देखाएका उनले आरोप लगाएका छन् । त्यसकै पछिपछि केही पत्रकार कुदेका उनको आरोप छ ।
नगर प्रमुख थापाले आफ्नो पारिश्रमिक भत्ता भन्दा बढी २७ लाख रुपैयाँ आफूले अघिल्लो कार्यकालमा सामाजिक सेवामा लगाएको जानकारी गराउदैं यो कार्यकालमा पनि पारिश्रमिक भत्ता सूर्यविनायककै सेवामा खर्च गर्ने जिकिर गरे । पत्रकार सम्मेलननै गरी यसबारे जानकारी गराउने उनको भनाइ छ ।
नगरपालिकाले शिक्षा, स्वास्थ्य र खानेपानीलाई विशेष प्राथमिकताका साथ् अघि बढाएको उनले बताए । नगरका फराकिला र कालोपत्रे बाटोघाटो र भौतिक संरचनाले सूर्यविनायकको बिकासबारे बताउने भन्दै उनले कृषी र पर्यटनलाई सम्वृद्धिको आधार बनाउन तल्लीन रहेको तथ्य पनि प्रस्तुत गरे ।
डोलेश्वर महादेव केदारनाथको शिर घोषणा भएको १५ वर्ष पूरा भएर १६ वर्षमा प्रवेश गरेको र दिन प्रतिदिन पर्यटकको आकर्षण बढ्दै गएको उनले बताए । स्थानीय सरकारको अधिकार प्रयोग गर्दै केदारनाथको शिर डोलेश्वर घोषणा भएको दिन भदौं ६ गते स्थानीय पर्व बिदाको प्रचलन चलाएको र यसले यो क्षेत्रको प्रचारप्रसारमा मद्दत मिल्ने उनले बिश्वास व्यक्त गरे ।
सो अवसरमा नगर प्रमुख थापाकी पत्नी अम्बिका थापा पनि उपस्थित थिइन् ।
कार्यक्रममा सूर्यविनायक नगरपालिकाकी उपप्रमुख सरिता तिम्सिना भट्टराईले श्रावणी मेला र डोलेश्वर मन्दिरका कारण स्थानीय उत्पादनले बजार पाएको र आम्दानीको श्रोत बढेको बताइन ।
त्यसैगरी प्रमुख जिल्ला अधिकारी रोशनी कुमारी श्रेष्ठले धेरै दान दिने व्यक्तिलाई सम्मान गर्दा समाजमा विभेद उत्पन्न हुनसक्ने तर्फ सचेत गराइन । दान गर्न नसक्नेको मनोविज्ञान बुझी दानलाई गोप्य राख्नुपर्ने तथा करकाप र देखासेखी रहित बनाउनुपर्ने उनले बताइन ।
कार्यक्रममा वडा नम्बर ८ का वडाध्यक्ष पुष्पराज बस्नेतले ३८ दिनसम्म चलेको मेला शान्तिपूर्ण रुपमा सम्पन्न भएको जानकारी गराए । स्थानीयले मेलाप्रति अपनत्व लिएर स्वयंसेवा गरेका र मेलालाई भब्य बनाएका उनले बताए ।
डोलेश्वर महादेव संरक्षण तथा विकास समितिका अध्यक्ष धर्मराज बस्नेतको अध्यक्षतामा सम्पन्न कार्यक्रमको संचालन महासचिव हरिशरण बस्नेतले गरेका थिए । कार्यक्रममा उपाध्यक्ष रामेश्वर बोहोराले स्वागत मन्तब्य राखेका र कोषाध्यक्ष रत्नप्रसाद छुकांले मेलाको आम्दानी खर्च सार्वजनिक गरेका सचिव कविराम थापाले बताएका छन् ।
कार्यक्रममा रास्ट्रपति चुरे संरक्षणकी सदस्य,नगरपालिकाका प्रमुख प्रशासकीय अधिकृत तारानाथ लुइँटेल, वडाध्यक्ष लगायत जनप्रतिनिधिहरु, इन्द्रबक्स गणका गणपति मोहनबहादुर थापा, जगाती वृत्तकी डिएसपी दिप्ती कार्की लगायतको समेत आतिथ्यता रहेको थियो । कार्यक्रम अघि प्रमुख अतिथि लगायत अतिथिहरुले डोलेश्वर महादेवको पूजाअर्चना गरेका थिए ।
बिहीवार डोलेश्वरको चारै ढाेका खुला गरिनुका साथै सबै श्रद्धालुलाई गर्भगृहमै प्रवेश गरी पूजाअर्चना गर्नसक्ने व्यवस्था मिलाइएको थियो ।