अख्तियार दुरुपयोग अनुसन्धान आयोगका कार्यवाहक प्रमुख आयुक्त नवीनकुमार घिमिरेले आम नागरिकको अपेक्षा अनुरुप आफूलाई सुम्पिएको जिम्मेवारी इमान्दारी र निष्ठाका साथ तोकिएकै समयमा सम्पादन गर्न आयोगमा कार्यरत कर्मचारीलाई निर्देशन दिएका छन । उनले आयोगको काम कारवाहीले जनमानसमा सकारात्मक सन्देश प्रवाह गराउन सक्नु पर्ने कुरामा समेत जोड दिएका छन ।

कार्यवाहक प्रमुख आयुक्तको जिम्मेवारी सम्हालेपछि बुधवार आयोगमा कार्यरत सबै तहका कर्मचारीहरुलाई निर्देशन दिँदै उनले आयोगलाई नीति र पद्धतिबाट अगाडि बढाउन आफूले सक्दो प्रयत्न गर्ने बताए । कार्यवाहक प्रमुख आयुक्त घिमिरेले अनुसन्धानको प्रक्रियालाई छिटो, छरितो र सहज ढंगबाट सम्पादन गर्ने दिशामा केन्द्रित हुन सबैलाई निर्देशन समेत दिए ।

घिमिरेले बुधवारबाटै कार्यवाहक प्रमुख आयुक्तको जिम्मेवारी सम्हालेका छन् । उनी वि सं २०७१ साल चैत १९ गते आयोगको आयुक्तमा नियुक्त भएका थिए ।