बुटबल, ९ फागुनगुण्डा नाइके मनोज पुनसहित उनका सहयोगी प्रहरीको इन्काउन्टरमा परेका छन् । प्रहरीको इन्काउन्टरमा परेका उनीहरुको बुधवार ज्यान गएको छ ।
भारतमा लुकिछिपी नेपालमा हत्या, अपहरण र चन्दा आतंक चलाउदै आएको पुनको मृत्यु भएको प्रहरीले पुष्टि गरेको छ । पुनको टोलीले प्रहरी टोलीमाथि आक्रमण गरेपछि जवाफी कारवाहीमा परेको रुपन्देहीका एसपी श्याम ज्ञवालीले पुष्टि गरे । प्रहरीको गोली लागेर घाइते भएका पुन र उनका सहयोगी सोम आलेको ज्यान गएको प्रहरीले जनाएको छ ।
पुन भारतबाट नेपाल पसेको र रुपन्देहीको भवानीपुरमा आपराधिक गतिविधि गरिरहेको भन्ने सूचनाका आधारमा प्रहरीले सर्च अभियान चलाएको बताइएको छ । सर्च गर्न पुगेको प्रहरी टोलीमाथि एक्कासी पुन समूहबाट आक्रमण भएपछि प्रहरीले प्रतिकार गरेको र जवाफी कारवाहीमा गोली लागेर पुन र उनका सहयोगीको मृत्यु भएको प्रहरीले जानकारी गराएको छ ।
युवा संघका रुपन्देही जिल्ला अध्यक्ष दुर्गा तिवारी र युवा संघकै कार्यकर्ता वसन्त पौडेल बलुको हत्याको जिम्मा पुनले लिएका थिए । काठमाडौंका समिरमानसिंह बस्नेत समुहसँग मिलेर नेपाल निर्माण व्यवसायी महासंघका अध्यक्ष शरद गौचनको हत्यामा समेत उनले संलग्नता स्वीकारेका थिए ।