भक्तपुर, १० फागुननेकपा माओवादी केन्द्रले आफ्ना मन्त्रीहरुको टुंगो लगाउन नसक्दा सरकार बिस्तार हुन सकेको छैन । मन्त्री छान्न माओबादी केन्द्रलाई सकस परेकोले सरकार बिस्तारमा ढिलाई भएको हो ।
सरकार विस्तारका लागि माओबादी केन्द्रका अध्यक्ष प्रचण्डसंग प्रधानमन्त्री केपी शर्मा ओलीले बार्ता गरिरहेको बुझिएको छ । प्रधानमन्त्री ओलीले मन्त्रालयको नामै तोकेर बाँडफाँड नगर्दा कसलाई मन्त्री बनाउने भन्ने निर्णय लिन कठिनाइ भएको श्रोतले बतायो ।
श्रोतका अनुसार अर्थ एमालेले राख्ने र गृह माओबादीलाई दिने सहमती भने बनिसकेको छ । अर्थको लागि एमालेले महासचिव इश्वर पोखरेललाई तयार पारिसके पनि गृहमा माओबादी केन्द्रका २ आकांक्षीबीच कडा प्रतिष्पर्धा देखिएको छ ।
अध्यक्ष प्रचण्डले सरकारको नेतृत्व गरेर पठाउने आस्वाशन दिएका बर्षमान पुन अनन्त राम बहादुर थापा बादलको इन्ट्री संगै रुष्ट बनेका छन । बादललाई नेतृत्व दिएर सरकारमा पठाउने भए आफुले गृह मन्त्रालय पाउनुपर्ने उनको माग छ ।
अध्यक्ष प्रचण्डको परेशानी यतिबेला बढेको छ । उनी बादलको कुरा काट्न सक्दैनन् भने आफ्नो विश्वासपात्र रहेका अनन्तलाई चिढाउन पनि चाहदैनन् । उनले अनन्तलाई बिहीवार बिहानै बोलाएर गृह दिने बचन नै दिएको अनन्त निकट एक रोल्पाली नेताले जानकारी दिएका छन । यतिबेला प्रचण्ड बादललाई मनाउनेतिर लागेको बुझिएको छ ।
सकेसम्म आजै साझसम्म नभए शुक्रवारसम्म बादल र अनन्त सरकारमा सहभागी हुने श्रोतको दावी छ ।