काठमाडौँ, २० फागुनप्रधानमंत्री समेत रहेका नेकपा एमाले अध्यक्ष केपी ओलीको क्याम्पमा नभएकै कारण नेतृ अष्टलक्ष्मी शाक्य मुख्यमन्त्री नभएकोप्रति संकेत गर्दै नेताहरु चिन्तित बनेका छन् । मोतीदेवी स्मृति प्रतिष्ठान समाजको एक कार्यक्रममा नेतृत्वमा महिलालाई स्थापित गर्न नसकेको प्रति चिन्ता व्यक्त गरियो ।
नेकपा एमालेका वरिष्ठ नेता झलनाथ खनालले उनीहरुलाई सम्मान गर्दै पार्टीभित्र व्याप्त गुटबन्दीका कारण महिला अधिकारका लागि जीवनभर संघर्ष गर्ने महिलालाई नेतृत्वमा स्थापित गर्न नसकिएकामा चिन्ता व्यक्त गरे ।
उनले मुलुकमा ६८ वर्ष अगाडिदेखि शुरु भएको जनक्रान्ति सम्पन्न भएको बताउँदै संविधानसभाबाट जारी भएको संविधानले सबैका अधिकारलाई सुरक्षित गरेको भए पनि महिला अधिकार प्राप्तिमा अझै पनि पछि परेको र उनीहरुलाई शोषण भइरहेको बताए ।
कार्यक्रममा राजनीतिकर्मी उतरा कोइराला, कलाकार निशा शर्मा, पत्रकार संगीता लामा, समाजसेवी सुवर्ण केशरी, खेलाडी निरा कायस्थ, अपांगता भएकी संगीता पन्त, दलित अधिकारकर्मी रामरति राम र आरोही चुनु श्रेष्ठ लाइ सम्मानित समेत गरिएको थियो ।
नेकपा एमालेका उपाध्यक्ष तथा प्रतिष्ठानका अध्यक्ष अष्टलक्ष्मी शाक्यले मोतीदेवीले काठमाडौँबाट कलकत्तासम्म हिँडेर गएर कम्युनिष्ट पार्टी गठनका समयमा संस्थापक सदस्यका रुपमा जिम्मेवारी लिएर निष्ठाको राजनीति गर्नुभएको स्मरण गरिन् ।
ललितपुरमा जन्मेकी मोतीदेवीको विसं २०५४ मा ८६ वर्षको उमेरमा निधन भएको थियो ।