भक्तपुर, २५ फागुन शालीन नेताको छवी बनाएका माओवादी केन्द्रका सांसद कृष्णबहादुर महरा सभामुखको उम्मेदवार बन्ने भएका छन । शुक्रवार बिहान अध्यक्ष प्रचण्ड निवास खुमलटारमा बसेको शिर्ष नेताहरुको बैठकले महरालाई सभामुखको उम्मेदवार बनाउने घोषणा गरेको हो ।
एमालेको भागमा राष्ट्रपति परेपछि सभामुख आफुले पाउनुपर्ने माओबादी केन्द्रको माग रहेपनि एमालेले आलटाल गरिरहेपछि माओबादी केन्द्रले औपचारिक उमेदवारको रुपमा महरालाई घोषणा गरेको थिएन । यद्यपी महरालाई सभामुख बनाउने मनस्थिति माओबादीले शुरु देखि नै बनाएको थियो र उनको नाममा पार्टीमा कुनै बिबाद पनि थिएन ।
माओबादी केन्द्रले सभामुख पाउनुपर्ने आफ्नो अडान नछोडेपछि अन्तिम आवरमा आएर महराको नाममा एमाले पनि सहमत भएको श्रोतले बतायो ।
शुक्रवार नै संघीय संसद सचिवालयमा सभामुखको उम्मेदवारको रुपमा महराले उम्मेदवारी दर्ता गर्नेछन । भोली नै सभामुखको निर्वाचन हुने कार्यतालिका रहेको छ । बाम गठबन्धनको साझा उम्मेदवार हुनेहुँदा महराको जीत सुनिश्चित देखिएको छ । बिबादरहित व्यक्तित्व भएका कारण महरा सर्वसम्मत सभामुख हुनसक्ने सम्भावना समेत रहेको उनी निकट श्रोतले इभक्तपुरलाई जानकारी गराएको छ ।