बर्दिवास, २७ फागुन अघिल्लो कार्यकालमा पानी जहाज चलाउने कुरा गरेका प्रम केपी ओलीको विरोधीहरुले निकै मजाक बनाएका थिए । अहिलेको उनको कार्यकालमा पानीजहाज नआएपनि रेल भने आउने भएको छ ।
लामो समय जनकपुर-जयनगर रेल्वे बन्द भएपछी रेल बिहिन बनेको नेपाली भूमिमा आगामी असोजदेखि पुनः रेल आउने भएको हो । जयनगरबाट – जनकपुर र महोत्तरीको बिजलपुरा सम्म असोज भित्र रेल कुद्ने भएको छ ।
तर यो रेल नेपाल सरकारले कुदाउन लागेको भने होइन । भारत सरकारले नै नेपाली भूमिमा रेल कुदाउने भएको छ।
न्यारोगेजमा सञ्चालन हुने पुरानो रेलमार्गको ५२ किमिलाई सुधार गरेर अहिले तत्काललाई ३५ किमिमा ब्रोडगेजको रेल सञ्चालन गर्ने गरी काम भइरहेको छ। यसलाई ७० किमिको दूरीमा सञ्चालन गर्ने गरी काम अघि बढाइएको रेल विभागले जानकारी दिएको छ।
भारतले बर्दिवाससम्म आउनेगरी ७० किमि दूरीमा रेलमार्ग बनाउँदैछ। यसमध्ये भारत भूमिमा जम्मा ३ किमि मात्र पर्छ । २०७५ को असोजसम्ममा ३५ किमि पूर्ण रूपमा तयार हुनेछ र बर्दिबास सम्म नआइपुगे पनि बिजलपुरासम्म भारतीय रेल दौडने छ ।