सर्लाही, ६ चैतसर्लाहीको हरिपुर नगरपालिकालाई दुई महिना भित्र मदिरा रहित नगर घोषण गर्नेगरी काम अगाडि बढाइएको छ । मदिरा सेवनले आर्थिक सामाजिक लगायतका समस्याहरु बढेको ठहर गर्दै हरिपुरलाई मदिरारहित नगर घोषणा गर्न लागिएको हो ।
आगामी दुई महिना भित्र हरिपुर नगरपालिकालाई मदिरा रहित नगर घोषणा गर्ने उदेश्य सहित अहिले प्रहरीले नगरका बिभिन्न वडाहरुमा घरेलु मदिरा उत्पादन तथा बिक्रि बितरण नगर्न चेतावनी सहित माइकिङ गरिरहेको इलाका प्रहरी कार्यालय हरिपुरका प्रहरी निरीक्षक अनिल ठकुरीले बताए ।
नगरपालिकाका मेयर ,उपमेयर , सबै वडाका वडा अध्यक्ष, सद्स्य, समाजसेवी बुद्धिजीवी तथा सर्बसाधरण सहितको सर्बपक्षिय भेलाबाट निर्णय भए अनुसार आफुहरुले घरेलु मदिरा नियन्त्रणका लागि अभियान चलाएको उनको भनाई रहेको छ ।
पहिलो चरणमा मदिरा उत्पादन ,सेवन तथा बिक्री बितरण नगर्न आग्रह गरिने त्यस पछि मदिरा उत्पादन गर्नेहरुलाई भेला गराई मदिराको कारोबार नगर्न आग्रह गरिने र त्यस पछि पनि लुकि छिपी कसैले मदिराको कारोबार गरेको पाईए कडा कार्बाही गरिने इलाका प्रहरी कार्यालय हरिपुरले जनाएको छ ।
एक हप्ता यता मात्रै हरिपुर प्रहरीले बिभिन्न सवारी साधन मा बिक्रिका लागि लुकाई छिपाई नवलपुरबाट सदरमुकाम मलङ्वा तर्फ लादै गरेको १ हजार लिटर भन्दा बढी घरेलु मदिरा बरामद गरि नस्ट गरेकोसमेत बताइएको छ ।