सर्लाही, १५ चैतनेकपा ( एमाले ) का बरिष्ठ नेता माधव कुमार नेपालले एक साता भित्र नै पार्टी एकता हुने खुलासा गरेका छन् । रात रहे अग्राख पलाउन सक्ने देखिएको दावी गर्दै एक सातामै पार्टी एकता हुने उनले ठोकुवा गरे ।
पछिल्लो समय नेकपा माओबादी केन्द्रले ५० – ५० हैसियतमा मात्र एकता हुनसक्ने अडान लिएपछि एकता प्रक्रिया लम्बिएको आसंका चलिरहदा नेता नेपालले यस्तो खुलासा गरेका हुन् ।
बिहिवार प्रेस चौतारी नेपालको सर्लाही शाखाले आयोजना गरेको पत्रकार भेटघाटमा नेता नेपालले भने , ” एकताबाट भाग्ने छुट एमाले र माओबादी केन्द्र दुवैलाई छैन । एक साताभित्र नै पार्टी एकता हुन्छ ।” उनले पार्टी एकतापछि मात्र प्रधानमन्त्री केपी ओलीको भारत भ्रमण हुने पनि बताएका छन् । ” शंका गर्नुपर्ने ठाँउ छैन, प्रधानमन्त्री पार्टी एकता पछि मात्र भारत भ्रमणमा जानुहुन्छ , ढुक्क हुनुस् ।” उनले भने ।
बिहिबार सर्लाहीको हरिवनमा अनेरास्ववियु दुई नम्बर प्रदेशले आयोजना गरेको संघीयतामा शिक्षा बिषयक अन्तरक्रिया र प्रतिनिधि तथा प्रदेश सभाका सदस्यहरुको सम्मान कार्यक्रमलाई सम्बोधन गर्न आईपुगेका नेता नेपालले दुई नम्बर प्रदेशको समग्र बिकाशको लागि आर्थिक शिखर सम्मेलन गर्ने तयारी भएको पनि भनेका छन् । उनले दुई नम्बर प्रदेशमा सरकारले बिशेष प्याकेज ल्याउने जिकिर गर्दै शिक्षा स्वास्थ्य, कृषि ,पर्यटन र उद्योग व्यापारमा नमूना गरेर देखाउने दावी समेत गरे ।
