काठमाडौं, २१ चैत बधाई खान होटलसम्म पुगेका शिक्षा, बिज्ञान तथा प्रविधी मन्त्री गिरिराजमणि पोखरेलले उल्टै बधाई दिने बिद्यालय संचालकहरुलाई चेतावनी दिएका छन । नयाँ शैक्षिक सत्रमा जथाभावी शुल्क नलिन उनले निजी बिद्यालय सञ्चालकहरुलाई चेतावनी दिएका हुन् ।
बिद्यालय संचालकहरुको संगठन निजी तथा आवसीय बिद्यालय अर्गनाइजेशन नेपाल( प्याब्सन ) केन्द्रीय सचिवालयद्वारा आज काठमाण्डौंमा आयोजित बधाई तथा शुभकामना कार्यक्रममा बधाई तथा शुभकामना ग्रहण गर्न पुगेका पोखरेलले आफु सम्बन्धमा भन्दा नियममा चल्ने प्रष्ट पारे । ”जथाभावी शुल्क लिनु सह्य हुन् सक्दैन । निर्देशिका ऐन, नियममा रहेर शुल्क लिनुस् । नाफा मात्र चाहिने भए शिक्षामा होइन, अन्य क्षेत्रमा लगानी गर्नुस ।” निजी बिद्यालय संचालकहरुलाई मंत्री पोखरेलले निर्देशन दिए ।
नियम विपरीत शैक्षिक शुल्क उठाएको गुनासोहरु आएका बताउदैं पोखरेलले यस्ता कार्य तत्काल बन्द गर्न निर्देशन दिदै अन्यथा आफु कडा रुपमा प्रस्तुत हुने समेत प्रष्ट पारेका छन ।
बिद्यार्थीहरुलाई पुस्तकको भारी बोकाएर शिक्षा नबढ्नेसमेत मन्त्री पोखरेलले ठोकुवा गरे । बिद्यार्थीले बोक्नैं नसक्नेगरी अव्यवहारि ढंगले पुस्तक किन्न लगाउनु गलत भएको भन्दै मन्त्री पोखरेलले बिद्यार्थी मैत्री पाठ्यपुस्तक हुनुपर्नेमा जोड दिए । ”किताव देखेरै बिद्यार्थी भाग्ने अवस्था अन्त्य गर्नुपर्छ , कितावलाई बोझको रुपमा होइन, खोजको रुपमा विद्यार्थीले बुझ्न सक्नुपर्छ । ” उनले भने ।
निजी, सहकारी र सामुदायिक बिद्यालयसंग सहकार्य गर्न शिक्षा मन्त्रालय तयार रहेको बताउदै मन्त्री पोखरेलले बैशाख पहिलो साताबाट बृहत बिद्यार्थी भर्ना अभियान शुरु गरिने जानकारी गराए । उनले उक्त अभियानमा कम्तिमा समुदायका एक बालबालिका भर्ना गर्न अनुरोध समेत गरेका थिए ।
मन्त्रालयले भर्ना अभियान शुरु गर्दा धेरैजसो निजी विद्यालयले भर्ना बन्द गरिसक्ने बिषयमा भने मन्त्री पोखरेल मौन रहेका थिए ।