भक्तपुर, २२ चैत‘सिन्डिकेट’का समर्थक यातायात व्यवसायीहरु आन्दोलनबाट पछि हटेका छन । यातायात बन्द गरेर आन्दोलनमा उत्रदा समेत सरकारले टसको मस नगरी उल्टै कारवाहीको चेतावनी दिएपछि आन्दोलनकारीहरु पछि हटेका हुन् ।
मयुर यातायातको बसलाई रोक्न कोटेश्वर पूर्वका १२ यातायात व्यवसायी समितिले आइतवारबाट संयुक्त आन्दोलन गरेका थिए । उनीहरुले बुधवार दिनभर बस नचलाउदा जनजीवन असहज बनेको थियो । तर यातायात व्यवस्था विभागले सोही दिन थप नयाँ आठवटा समितिलाई अस्थायी इजाजत दिएपछि अलमलमा परेका आन्दोलनकारी व्यवसायी आफ्नो मागबाट ब्याक हुन् बाध्य भए ।
उनीहरुले बिहीबार यातायातमा अवरोध गरेका छैनन् । आन्दोलनमा उत्रेका व्यवसायीहरुको बस आज निर्वाधरुपमा चलेका छन । काठमाडौ–भक्तपुर – बनेपा–पनौती रुटमा यतिबेला यात्रीले सहजपूर्वक यात्रा गरिरहेका छन ।
सरकारको निर्णय नमान्नेको रुट परमिट खारेज गर्ने यातायात व्यवस्था विभागले चेतावनी दिएपछि व्यवसायी पछि हटेका र आज कोटेश्वर पूर्वका बस यथावतरुपमा संचालनमा आएका यातायात व्यवस्था विभागका महानिर्देशक रुपनारायण भट्टराइले जानकारी गराएका छन् ।