प्रधानमन्त्री केपी शर्मा ओलीको तीनदिने भारत भ्रमणमा रेलमार्गबाट काठमाडौँलाई भारतको रक्सौलसम्म जोड्ने, दुई देशबीच जलयातायातबाट समेत सम्पर्क विस्तार गर्ने र कृषि क्षेत्रमा नयाँ साझेदारी स्थापना गर्ने तीन महत्वपूर्ण विषयमा समझदारी भएको छ ।

प्रधानमन्त्री ओली र भारतीय प्रधानमन्त्री नरेन्द्र मोदीबीच भएको भेटघाट र छलफलपछि जारी १२ बुँदेसहित यी तीन विषयमा छुट्टाछुट्टै प्रेस विज्ञप्ति जारी गरिएको छ । भारतको तीनदिने राजकीय भ्रमणमा जानुभएका प्रधानमन्त्री ओली र समकक्षी प्रधानमन्त्री मोदीबीच शनिबार द्विपक्षीय सम्बन्धका विषयमा छलफल भएको थियो । त्यसलगत्तै १२ बुँदेसहित रेल, जल यातायात र कृषिसँग सम्बन्धित तीन छुट्टाछुट्टै संयुक्त प्रेस विज्ञप्ति जारी गरिएको थियो ।

१२ बुँदे प्रेस विज्ञप्तिमा दुवै देशका प्रधानमन्त्रीले बहुआयामिक नेपाल–भारत सम्बन्धका सबै पक्षमा समीक्षा गर्नुका साथै दुई देशका सरकार, निजी क्षेत्र र जनस्तरमा झाँगिएको साझेदारीको स्वागत गरिएको छ ।

साझा ऐतिहासिक तथा सांस्कृतिक सम्बन्ध र जनता–जनताबीचको सम्पर्कमा आधारित मैत्रीपूर्ण नेपाल–भारत सम्बन्धको सुदृढ आधारशीलाको स्मरण गर्दै दुवै प्रधानमन्त्रीले नियमित रूपमा उच्चस्तरीय राजनीतिक भेटघाटलाई निरन्तरता दिन बचनबद्धता व्यक्त गरेका छन् ।

भारतीय प्रधानमन्त्री मोदीले प्रधानमन्त्री ओलीसँग नेपाल सरकारको प्राथमिकताअनुसार भारतले सघाउने प्रतिबद्धता पनि व्यक्त गर्नुभएको छ । नेपाल सरकारले भारतसँगको मैत्रीपूर्ण सम्बन्धलाई थप सुदृढ तुल्याउन उच्च महत्व दिएको बताउँदै द्विपक्षीय सम्बन्धलाई भारतको विकास र समृद्धिबाट नेपालको आर्थिक रूपान्तरण गर्न चाहेको प्रधानमन्त्री ओलीले उल्लेख गर्नुभएको वक्तव्यमा जनाइएको छ ।

प्रधानमन्त्री मोदीले भारत सरकारको ‘सबैको साथ सबैको विकास’ दृष्टिकोण समावेशी विकास र समृद्धिका निम्ति छिमेकीसँग सहकार्य गर्ने मार्ग निर्देशक नीतिकै रूपमा रहेको बताए ।

प्रधानमन्त्री ओलीले युगान्तकारी राजनीतिक परिवर्तनपछि नेपाल सरकारले ‘समृद्ध नेपाल ः सुखी नेपाली’ भन्ने सिद्धान्तका साथ आर्थिक रूपान्तरणलाई प्राथमिकता दिएको बताए ।

प्रधानमन्त्री मोदीले स्थानीय तह, संघीय संसद् र पहिलो प्रान्तीय निर्वाचन सफलतापूर्वक सम्पन्न गरेकामा नेपाली जनता र नेपाल सरकारप्रति हार्दिक बधाई ज्ञापन गर्दै नेपाल र नेपालीले देशको विकास र स्थायित्वका लागि लिएको दूरदृष्टिको सरहाना गर्नुभयो ।
दुवै प्रधानमन्त्रीले वीरगन्जस्थित एकीकृत जाँच चौकीको उद्घाटन गर्दै त्यसको शीघ्र सञ्चालनबाट सीमापार व्यापार तथा वस्तु र सर्वसाधारणको आवागमनले विकास र आर्थिक वृद्धिमा योगदान पुग्ने विश्वास व्यक्त गरे ।

दुवै देशका प्रधानमन्त्रीले भारतको मोतीहारी–अमलेखगन्ज सीमापार पेट्रोलियम पदार्थ पाइपलाइन बिछ्याउने परियोजना कार्यारम्भको ‘भिडियो’ सम्मेलनमार्फत अवलोकन गरे ।

नेपालमा सञ्चालित विकासका द्विपक्षीय परियोजनालाई द्रुत गतिमा कार्यान्वयन गर्नुपर्ने र नेपाल–भारत सम्बन्धका विविध क्षेत्रका सहयोगका कार्यसूचीलाई लागू गर्ने विद्यमान संयन्त्रलाई पुनर्जीवित गर्नुपर्नेमा प्रधानमन्त्रीद्वयले जोड दिए ।

प्रधानमन्त्री ओलीको भ्रमणबाट बहुआयामिक नेपाल–भारत साझेदारीमा नयाँ आयाम थपिएकामा दुवै देशका प्रधानमन्त्रीले सहमति जनाउनुभयो । भारत भ्रमणका निम्ति गर्नुभएको आमन्त्रण र आफू नेतृत्वको प्रतिनिधिमण्डलप्रति देखाइएको हार्दिक आतिथ्यका लागि प्रधानमन्त्री ओलीले भारतीय समकक्षी मोदीप्रति आभार व्यक्त गरे ।

प्रधानमन्त्री ओलीले भारतका प्रधानमन्त्री मोदीलाई यथाशक्य चाँडो नेपालको भ्रमण गर्न आमन्त्रण गरे । प्रधानमन्त्री मोदीले भ्रमणको आमन्त्रणलाई स्वीकार गरे । प्रधानमन्त्री मोदीको भ्रमणको मिति कूटनीतिक माध्यमबाट अन्तिम रूप दिने जनाइएको छ ।