विराटनगर ।

प्रदेश १ को तीन महिने बजेट पारित भएको छ ।प्रदेश संसदको बुधबारको २० औं बैठकले आर्थिक वर्ष ०७४/७५ को बाँकी तीन महिनाका लागि प्रस्ताव गरिएको एक अर्व एक करोड ९४ लाख ६५ हजार रुपैयाँको बजेट पारित गरेको हो ।

आर्थिक मामिला तथा योजना मन्त्री इन्द्र आङम्बोले प्रदेश सभाको १८ औ बैठकमा आर्थिक विधेयक टेबल गराएका थिए ।

विधेयक माथि प्रदेश सांसदहरुले उठाएका प्रश्नको विभागीय मन्त्री आङम्बोले जवाफ दिएपछि विधेयक पास भएको हो ।

बैठकमा आर्थिक मामिला तथा योजना मन्त्री आङम्बोले विनियोजन विधेयक पारित गरियोस भनी गरेको प्रस्ताव ध्वनी मतका आधारमा बहुमतले पारित भएको हो ।

विधेयक पास भएसगैं चालु आबको बाँकी अवधिका लागि प्रदेश १ अन्तर्गतका निकायहरुले गर्ने सेवा र कार्यहरुको लागि प्रदेश सञ्चित कोषबाट रकम खर्च गर्ने अधिकार प्राप्त भएको छ ।

यअघि प्रदेश सभाको १२ औं बैठकले आर्थिक कार्यविधि विधेयक पास गरिसकेको छ ।