काठमाडाैं-३१ शान्तिनगरमा निशुल्क मिर्गौला परीक्षण शिविर सम्पन्न भएको छ । बाबियाखर्क बचत तथा ऋण सहकारी सस्था लिमिटेडको प्रमुख आयोजनामा शनिवार उक्त शिविर सम्पन्न भएको हो ।

बाबियाखर्क साकोस लगायत रामेछाप बाबियाखर्क समाज, जागृतिनगर टोलसुधार समिति एवम् जागरुक महिला समुह समेत आयोजक रहेको शिविरमा स्वस्थ मिर्गौला , स्वस्थ नेपाल भन्ने अभियान चलाइरहेको रास्ट्रिय मिर्गौला उपचार केन्द्रले प्राविधिक सहयोग गरेको थियो ।

वरिष्ठ मृगौला रोग विशेषज्ञ डा. ॠषिकुमार काफ्लेको नेतृत्वमा डा.वर्षा श्रेष्ठ लगायत २५ जनाको चिकित्सक टिमद्वारा उक्त शिविरमा सेवा प्रदान भएको बाबियाखर्क साकोसका प्रबन्धक रमेश घिमिरेले जानकारी गराएका छन् । शिविरमा आफ्नो मिर्गौलाप्रति सचेत सस्थाका ३ सय ११ जना सदस्य तथा सम्भावित सदस्यहरूले मृगौला परीक्षण गराएका उनले बताए ।

मिर्गौला परीक्षण गरिएका ३ सय ११ मध्ये करीव ९ प्रतिशतमा मृगौला सम्बन्धि र चिनिरोगको उच्च समस्या देखिएको, करिब १५ प्रतिशतमा शरीरको उचाई र उमेरको हिसाबले अधिक तौल देखिएको तथा करिब ५ प्रतिशतमा कम तौल पाइएको वरिष्ठ मृगौला रोग विशेषज्ञ डा. ॠषिकुमार काफ्लेले रिपोर्ट गरेका थिए । डा. काफ्लेले अधिक समस्या देखिएका बिरामीहरुलाई शिघ्र उपचारका उपाय समेत सुझाएका थिए ।

शिविरमा मिर्गौला स्वस्थ राख्ने उपायहरु र मिर्गौला खराब भएको थाँहा पाउने तरीकाहरुको बारेमा जानकारी गराइएको थियो भने समस्या आएपछिका सावधानीका बारेमासमेत सुसूचित गरिएको थियो ।

उक्त अवसरमा मिर्गौला बचाअाैं अभियानले आर्थिक अवस्था कमजोर भएका बिरामीहरुको सहयोगार्थ आर्थिक सहयोग समेत संकलन गरेकाे थियो । उक्त अभियानकालागि ५० जनाले स्वेच्छिक रकम दान गर्दा करीव ५० हजार रुपैयाँ संकलन भएको बताइएको छ ।