एमाले–माओवादी बीच एकता भई नेपाल कम्युनिष्ट पार्टी बनेपछि पूर्वएमाले र पूर्वमाओवादीका केही नेता असन्तुष्ट देखिएका छन् । असन्तुष्ट हुनेहरुमा पूर्वएमालेका बढी नेता देखिएका छन् ।

पूर्वमाओवादीका केही नेता वैचारिक रुपमा असन्तुष्ट भएर एकता पूर्व नै आफ्नो बाटो लागे । वैचारिक रुपले असन्तुष्ट भएर बाहिरिनेमा गोपाल किराँती, आहुति, लोकेन्द्र बिष्ट लगायतका नेताहरु थिए ।

तर, पूर्व एमालेका नेताहरु एमाले–माओवादी एकताप्रति सहमत भए पनि जिम्मेवारी बाँडफाँडप्रति असन्तुष्ट देखिएका छन् । असन्तुष्ट हुनेहरुमा बरिष्ठ नेता झलनाथ खनाल देखि भीम रावल, ईश्वर पोखरेल, योगेश भट्टराई, घनश्याम भुसाल लगायत छन् ।

बरिष्ठ नेता झलनाथ खनालले आफूलाई चौथो बरियतामा राखेकोप्रति असन्तुष्टि जाहेर गरेका छन् । भीम रावलले हाई कमाण्डमा आफूलाई नराखेकोमा असन्तुष्ट छन् । रावलले त निर्णयमा पूनर्विचार नगरे आफूले कडा कदम चाल्ने चेतावनी नै दिएका छन् ।

पूर्वएमालेबाट बरिष्ठ नेताहरु भीम रावल, अष्टलक्ष्मी शाक्य, सुवास नेम्वाङ लगायतलाई किनारा लगाउँदै उपमहासचिव विष्णु पौडेललाई नेतृत्वमा ल्याएपछि नेताहरु असन्तुष्ट देखिएका हुन् । यद्यपि, पार्टी एकतामा नेता पौडेलले निर्णायक भूमिका खेलेका थिए ।

पूर्वमाओवादीबाट एकतामा भूमिका खेल्ने जनार्दन शर्मा पनि नेतृत्वका लागि आकांक्षी थिए । तर, पूर्वमाओवादीमा उनीभन्दा अघिल्लो बरियतामा धेरै नेता रहेका कारण उनले ठूलो जिम्मेवारीको अपेक्षा गरेका थिएनन् । शर्माले आफू एकताको पक्षमा रहेको र पार्टीले दिएको जिम्मेवारीअनुसार काम गर्ने बताइसकेका छन् ।

अहिलेको असन्तुष्टि हेर्दा भीम रावलले यत्तिकै चित्त बुझाउने देखिँदैन । ईश्वर पोखरेल आन्तरिक रुपमा निरास भए पनि बाहिर एकता ठीकै हो भन्नेमा देखिएका छन् । अहिलेको असन्तुष्टि हेर्दा नेताहरु नयाँ मोर्चाबन्दीका लाग्ने संकेत गरेका छन् ।

पार्टी एकतामा धेरै नेताहरुको व्यवस्थापन गर्न कठिन भएकाले पनि असन्तुष्टिको पारो बढिरहेको छ । मोर्चा र जनवर्गीय संगठनको एकतासम्म आउँदा आकांक्षाहरु आक्रोशमा बदलिने खतरा छ । हेरौं, ओली–प्रचण्डले संगठनात्मक चुनौतिको बिकल्प कसरी अघि सार्छन् ? धेरै कुरा यसैमा निर्भर देखिन्छ ।