राजविराज, ११ जेठसंघीय समाजवादी फोरम नेपालका अध्यक्ष उपेन्द्र यादवले बहुमतको कम्युनिष्ट सरकार आफै समाप्त हुने गरी काम गरिरहेको टिप्पणी गरेका छन् । कम्युनिस्ट आफैं समाप्त हुने र उनीहरू समाप्त हुने बखतसम्म मुलुक पनि तहसनहस भइसक्ने अध्यक्ष यादवले दाबी गरे ।
राजविराजमा भएको कार्यक्रममा बोल्दै अध्यक्ष यादवले वर्तमान कम्युनिष्ट सरकार दृष्टिबिहीन बनेर मुलुकलाई चलाउने प्रयास गरेको आरोप लगाए । ‘विश्वमा चीनबाहेक कुनै पनि देशमा कम्युनिस्ट शासन चल्न सकेको छैन’ उनले भने, ‘’चीनका पनि कम्युनिस्ट आफ्नै ढंगले राम्रो नीति बनाएर अगाडि बढिरहेका कारण अहिलेसम्म टिकेको हो ।”
विश्वका अन्य देशमा बनेका कम्युनिस्टहरू ध्वस्त भइसकेको र उनीहरूको ध्वस्तसँगै ती देशहरू पनि बर्बाद भइसकेको छ ।’ अध्यक्ष यादवले पोल्याण्ड, हंगेरी, चेकास्लाभिया, रोमानिया, सोभियत संघ, युगोस्लाभिया जस्ता देशमा कम्युनिस्ट शासन भएपनि ती शासनसँगै कम्युनिस्टहरू ध्वस्त भएको उल्लेख गरे ।
सप्तरी क्षेत्र नम्बर २ का प्रतिनिधिसभा सांसदसमेत रहेका यादवले प्रदेश २ समृद्ध नभएसम्म मुलुक समृद्ध बन्न नसक्ने बताए । उनले प्रदेश २ का जनता अधिकार सम्पन्न, आर्थिक रूपले समृद्ध भए मात्र पुरै नेपाल समृद्ध हुने जिकिर गरे ।
