पर्वत, १८ जेठपर्वतका एक युवाले मलेसियामा कुटपिटका कारण ज्यान गुमाएका छन् । मोदी गाउँपालिका–५ धमिलपानीका २२ वर्षीय किशोर केसी(नसिब)को कुटपिटका कारण मृत्यु भएको हो ।
उपचारको क्रममा केसीको बुधबार मृत्यु भएको हो । २० महिना अघि रोजगारीका लागि मलेसिया पुगेका क्षेत्री परिवारका सबैभन्दा कान्छा हुन् । करीब डेढ हप्ता पहिले आइतबार सँगै काम गर्ने नेपाली युवाले मरणासन्न हुनेगरी उनीमाथि आक्रमण गरेका थिए । १ नम्बर प्रदेशका ४ युवाहरुले आफ्नै साथी केसीमाथि रडले प्रहार गरेपछि उनको चिन्ताजनक अवस्थामा उपचार भैरहेको थियो । पेटमा गहिरो चोट लागेका केसी कमाएर घर फर्कने सपना अपुरै छोडी बुधबार मृत्युको मुखमा पुगे ।
उनको मृत्युको खबरले उनको घर परिवार मात्र नभई सिंगो गाउँ नै यतिबेला शोकमा डुबेको छ । उनकी आमा देवी क्षेत्री अर्धचेत अवस्थामा छिन् भने परिवारमा रुवाबासी छाएको छ ।
उनीमाथि ज्यानै लिने गरि आक्रमण गर्ने ४ जना नेपालीहरु मलेसियन प्रहरीको नियन्त्रणमा रहेकाे बुझिएको छ ।
