काठमाडौँ, जेठ १८ गते । तत्कालिन नेकपा (एमाले) र नेकपा (माओवादी केन्द्र) को एकतापछि पुनर्गठन भएको पार्टी नेपाल कम्युनिष्ट पार्टी अण्डरलाइनले आफ्नो नाम परिबर्तन गरेको छ । निर्वाचन आयोगमा नेपाल कम्युनिष्ट पार्टी नामको पार्टी यस अघि नै दर्ता रहेकोले उक्त नाम परिबर्तन गर्न नेकपा बाध्य बनेको हो ।

ऋषिराम कट्टेल अध्यक्ष रहेको नेपाल कम्युनिष्ट पार्टी नामक राजनीतिक दल यसअघि नै निर्वाचन आयोगमा दर्ता छ । निर्वाचन आयोगले अण्डरलाइन राखेकै भरमा उक्त नाम दिन आनाकानी गरेपछि नाम परिबर्तन गरि नयाँ नाम आयोगमा दर्ता गराइएको बुझिएको छ ।

नेपाल कम्युनिष्ट पार्टीको नाममा राखिएको ‘अण्डरलाइन’लाई हटाएर नेपाल कम्युनिष्ट पार्टी (नेकपा) राख्ने प्रस्ताव गरिएको छ । त्यसैगरी, अङ्ग्रेजीमा Nepal Communist Party (NCP) राखिने गरि नयाँ नाम प्रस्ताव गरिएको बताइएको छ ।

नाम जुधेकाले सच्याउन आयोगले अनुरोध गरेपछि नेपाल कम्युनिष्ट पार्टी (नेकपा) राख्ने गरी बिहीबार नै दल दर्ताका लागि निर्वाचन आयोगमा निवेदन दर्ता गरिएको उक्त पार्टीका उपनेता सुवास नेम्वाङले पुष्टि गरेका छन् । नेम्वाङ्ले पार्टीमा छलफल गरेर नयाँ नाम दर्ता गराइएको बताए ।