रुपन्देही, २० जेठविप्लब नेतृत्वको नेपाल कम्युनिष्ट पार्टीको जनपरिषदले गाउँपालिका प्रमुखमाथि कालो मोसो दलेको छ । सुद्धोधन गाउँपालिका प्रमुख किसुन चन्द्र चौधरीलाई आईतवार कालो मोसो दलिएको हो ।
बिकास निर्माणको काममा निकालिएको नदिजन्य पदार्थ स्थानीय ठेकेदार र ब्यापारीहरुलाई बेचेर कमिसन खाएको, गाँउपालिकाका बिभिन्न सामान खरिदका क्रममा प्रक्रिया मिलाएर नै कमिसन खाएको गुनासो जनस्तरबाटै आएका कारण प्रमुखमाथि कारवाही गर्नुपरेको जनपरिषदले जनाएको छ ।
त्यस्तै प्रमुख चौधरीले आर्थिक प्रशासन नियमावलीको धज्जी उडाउदै बिभिन्न व्यक्ति र समुदायलाई नीति विपरीत बजेट बाँडेर दुरुपयोग गरेको, बिकाश निर्माणमा राजनीति गरी पार्टीका कार्यकर्ता पालेको र योजनाबाट २० देखि २५ प्रतिशतसम्म कमिसन खाने गरेको आरोप पनि जनपरिषदले लगाएको छ ।
चुनाव बहिस्कार गरेको नेकपाले चुनावबाट निर्वाचित जनप्रतिनिधि जनताको वास्तविक प्रतिनिधि नभएको जिकिर गर्दै आएको छ । विशेषगरी स्थानीय सरकारले जनताको ढाड सेक्नेगरी कर वृद्धि गरेको, भ्रष्ट्राचार बढाएको, दलाली गरेको भन्दै नेकपा विरोधमा उत्रिएको छ । उसले पत्राचार गरेरै जनप्रतिनिधिहरुको राजिनामा माग गरेको छ ।