सर्लाही, २३ जेठजिल्ला प्रशासन कार्यालय सर्लाहीका शाखा अधिकृत सुरेश प्रसाद दास घुस लिएको आरोपमा पक्राउ परेका छन् । उनलाई अख्तियार दुरूपयोग अनुसन्धान आयोगको बिशेष टोलीले घुस लिएको आरोपमा बुधबार पक्राउ गरेको हो ।
शाखा अधिकृत दासले सेवाग्राहीबाट ५० हजार रुपैयाँ घुस लिएको बर्दिवास स्थित अख्तियार दुरुपयोग अनुसन्धान आयोगको सम्पर्क कार्यालयले जनाएको छ । शाखा अधिकृत दास चढेको बा ६ च ११८६ नम्बरको कारमा लुकाएर राखेको अवस्थामा ५० हजार रुपैयाँ फेला पारिएको अख्तियारको कार्यालयले जानकारी गरायो ।
दासलाई अख्तियार दुरुपयोग अनुसन्धान आयोगको सम्पर्क कार्यालय बर्दिवासको टोलीले जिल्ला अदालत अगाडिको चोकबाट नियन्त्रणमा लिएको हो । चोकको पसलमा पान खान पसेका उनी घुस खाएको आरोपमा पक्राउ परे ।
यस अघि पनि अख्तियारले तत्कालिन जिल्ला शिक्षा कार्यालय, मालपोत कार्यालय, जिल्ला समन्वय समितिका साथै बिधुत प्राधिकरणका कर्मचारीलाई पनि घुस रकम सहित पक्रेको थियो । रङ्गे हात पक्राउ गरेको भए पनि अझै सम्म उनीहरुलाई अख्तियारले कडा कार्बाहीको दायरामा ल्याउन नसकेको कारण खुलम्खुल्ला घुस लिने काम नरोकिएको नागरिक समाजका अगुवा उग्रकान्त झाको बुझाइ छ । जब सम्म अख्तियारले कार्बाहीको दायरामा ल्याएर कार्बाही गर्न सक्दैन तब सम्म घुस लिने काम को अन्त नहुने जानकारहरु बताउँछ्न ।
उता दासले भने आफूलाई सुनियोचित ढङ्गले फसाउने काम भएको जिकिर गरेका छन् । ” पान खान पसलमा बसिरहेको अबस्थामा अरु नै ब्यक्तिलाई कारको डिक्कीमा पैसा राख्न लगाई चारैतिर बाट घेरा हाली मेरो शरीर सर्च गरियो । शरिरमा नभेटे पछि गाडीको डिक्कीमा मैले राख्दै नराखेको रुपैयाँ निकाली मलाई फसाउने काम भयो ।” दासले दावी गरे ।
निर्दोष कर्मचारीलाई सुनियोचित ढंगले फसाउने काम भएको कर्मचारीहरुले आशंका गरेका छन् । फसाउनु परे अख्तियार लगाइदिने डर भएको भन्दै नाम नबताउने सर्तमा अख्तियार प्रति नै शंकाको आखाँले हेर्नु पर्ने अबस्था आएको एक कर्मचारीले बताए ।
”दास गलत नियतका होइनन् जस्तो लाग्छ । घटनाको सत्यतथ्य छानवीन हुनुपर्छ अन्यथा कर्मचारीको मनोबल गिर्छ ।”नेपालवालसंग उनले गुनासो गरे । पक्राउ परेका दास र उनको गाडीलाई भने अख्तियारको सम्पर्क कार्यालय बर्दिबास लगिएको छ ।