जनकपुर, ११ असारप्रदेश नम्बर २ का मुख्यमन्त्री मोहम्मद लालबाबु राउत गद्दीले अस्थायी शिक्षकहरुको समस्या समयमै समाधान हुनु पर्ने पक्षमा आफू रहेको बताएका छन् ।आइतबार अस्थायी शिक्षक केन्द्रीय आन्दोलन परिचालन समितिको ज्ञापन पत्र बुझ्दै मुख्यमन्त्री राउतले आफू अस्थायी शिक्षकको पक्षमा उभिने बताएका हुन् ।
लामो समयसम्म मुलुकको सेवा गरेका अस्थायी शिक्षकहरुसँग कुनै पनि ढंगले अन्याय हुनु नहुनेमा आफु स्पष्ट रहेको उनले बताए । शिक्षक सेवा आयोगले अषाढ २९ र ३० गते निर्धारण गरेको परीक्षाको मिति सार्नु पर्ने शिक्षकहरुको मागलाई संघीय सरकारले सम्बोधन गर्नु पर्ने उनको भनाइ रहेको छ ।
असार ६ गते सूचना प्रकाशन गरेर २९ र ३० गते परीक्षा लिनु न्यायपूर्ण नरहेको भन्दै उनले यस विषयमा संघीय सरकार, शिक्षा मन्त्रालय र आयोगसँग आफूले कुरा गर्ने समेत बताए । मुख्यमन्त्री राउतले अस्थायी शिक्षकलाई असन्तुष्ट पारेर कुनै शैक्षिक प्रगती हुन नसक्ने भन्दै उनीहरुको श्रमको सम्मान राज्यले गर्न सक्नुपर्ने जिकिर गरे ।
अस्थायी शिक्षक आन्दोलन परीचालन समितिका संयोजक बिन्दा दास थारुको नेतृत्वमा अस्थायी शिक्षकहरु मुख्यमन्त्री कार्यालय पुगेका थिए । उनीहरुले संघीय सरकारले आफूहरुको माग पुरा नगरे कडा आन्दोनल गर्ने चेतावनी समेत दिएका छन् ।
अस्थायी शिक्षकहरु परीक्षाको मिति सार्न माग गर्दै आएका छन् ।