धादिङ, १४ असारधादिङको उत्तरी भेगमा पर्ने खनीयाबास गाउँपालिका–५ स्थित सत्यदेवीको साईश्वाँरामा भिषण पहिरोमा परि एकै परिवारका ३ को मृत्यु भएको छ । राजु गोलेको घरलाइ पहिरोले बगाउँदा गोलेकी श्रीमती ३६ बर्षीया वसोधा गुरुङ, १० बर्षीया छोरी लक्ष्मी गुरुङ र ५ बर्षीया सरस्वती गुरुङको पहिरोमा परी मृत्यु भएको हो ।
दुई दिनदेखि परेको वर्षाका कारण गएराती गएको पहिरोले उक्त क्षती गराएको बताइएको छ । मृतकहरुको शव आज विहान पहिरोबाट निकालिएको छ । पहिरोमा परि ७ घर पुरिएको छ भने ४ जना घाइते भएका छन् ।
पहिरोमा परि घाइतेलाई स्थानीयले उद्धार गरी सत्यदेवी स्वास्थ्यचौकीमा उपचारका लागि पुर्याएका छन् ।
यसैगरी खनीयावास गाउँपालिका–४, चिउरीखर्कमा पनि पहिरोले विध्वंस गरिदिएको छ । चिउरीखर्कमा एक घर पहिरोले पुरिएको छ । सो पहिरोमा परी शम्शेर घले र कोप्ची घले बेपत्ता भएको इलाका प्रहरी कार्यालय, दार्खाले जनाएकाे छ ।
यसैगरी, नेत्रावती डपजोङ गाउँपालिकाको मार्पाकमा ५ घर पहिरोले बगाएकोे छ । घटनास्थल सदरमुकामबाट एक दिनको पैदल दूरीमा पर्दछ । वर्षाका कारण जिल्लाको उत्तरी भेगतर्फ जाने सडक भत्किएकाले सदरमुकामबाट मोटर चल्न छाडेको छ । यसले गर्दा उद्धारमा कठिनाइ आएको छ ।
घटनाको थप विवरण भने आउन बाँकी रहेको छ ।