चितवन, २३ असारपूर्वी चितवनको उत्तरी भेगमा पर्ने कालिका नगरपालिकामा किसानको खेतमा पसेर केराका बोट काट्नेहरु कारागार चलान भएका छन् । कालिका नगरपालिका –६ जुटपानीमा किसानको खेतमा पसेर केराको बोट काटेको आरोपमा पक्राउ परेका व्यक्तिहरु कारागार चलान भएका हुन् ।
कालिका नगरपालिका–६ बस्ने २१ वर्षीय अर्जुनकुमार डल्लाकोटीलाई पक्राउ गरी अदालतमा पेश गरिएको र शुक्रबारै उनलाई कारागार चलान गरिएको प्रहरीले जानकारी गराएको छ । जिल्ला अदालतले रु २ लाख ५० हजार धरौटी माग गरेकामा बुझाउन नसकेपछि डल्लाकोटी कारागार चलान भएको प्रहरी नायब उपरीक्षक शिव शर्मा आचार्यले जानकारी गराएका छन् । यसअघि पक्राउ परेका अन्य ५ आरोपी पनि रु २ लाख ५० हजार धरौटी तिर्न नसक्दा कारागार चलान भएका छन । ७ जना उक्त कार्यमा संलग्न रहेकोमा १ अझै फरार रहेको प्रहरीले बताएको छ ।
डल्लाकोटीसहित ७ जनाको एक समूहले गत वैशाख १७ गते किसानको खेतमा पसेर ३ हजार ९४ बोट केराको बोट काटेका थिए ।