धरान उपमहानगरपालिकाका प्रमुख तारा सुब्बाको निधन भएको छ । काठमाडौँस्थित ग्राण्डी इन्टरनेशनल अस्पतालमा उनको निधन भएको हो ।

तीन वर्ष अघि मिर्गौला प्रत्यारोपण गरेका ५२ वर्षीय सुब्बा फोक्सोमा निमोनियाबाट ग्रसित भएपछि अस्पताल भर्ना भएका थिए । उपचारका क्रममा आज उनको ज्यान गएको अस्पतालले पुस्टि गरेको छ ।

जेठदेखि नै बिरामी परेका नगर प्रमुख सुब्बा कामको चापले बढी नै व्यस्त रहनु परेकाले स्वास्थ्य उपचारमा ढिलाई भएको बताइएको छ । प्रमुख सुब्बाको धरानमा बुधबार अन्तिम दाहसंस्कार गरिने जानकारी प्राप्त भएको छ ।

तेह्रथुमको खाम्लालुङमा जन्मिएका सुब्बा स्कुले उमेरमै बिद्यार्थी आन्दोलनबाट राजनीतिमा जोडिएका थिए । उनी तत्कालिन नेकपा एमालेका सुनसरी जिल्ला अध्यक्ष हुनुका साथै दुई पटक केन्द्रीय सदस्यसमेत बने ।

उनका एक श्रीमती र एक छोरा छन ।