नेपालकी कृति गौतमले थाइल्याण्डको बैंककमा भइरहेको थाइल्याण्ड ओपन कराते च्याम्पियनसिपमा रजत पदक जितेकी छन् ।

शुक्रबार कृतिले महिला ३० केजी तौल समूहमा रजत पदक जितेको नेपाल ओकिनावा सुरिकेन सोरिन रियो कराते डो संघका सल्लाहकार एवं टिम व्यवस्थापक राम श्रेष्ठले जानकारी दिए ।

नेपालमा विभिन्न राष्ट्रिय पदक जित्न सफल कृतिले ११ वर्षमै अन्तर्राष्ट्रिय पदक जित्न सफल भएकी हुन् ।

टिम व्यवस्थापक श्रेष्ठका अनुसार सेमिफाइनलमा कृतिले भारतकी खेलाडीलाई ८–० ले पराजित गर्दै फाइनलमा प्रवेश गरेकी थिइन् । फइनलमा भने उनी उज्वेकिस्तानकी खेलाडी सँग १–० को झीनो अन्तरले चुक्न पुगिन् ।

क्यामेलिया स्कूल कालिमाटीमा कक्षा ५ मा अध्ययनरत गौतम पढाइमा पनि अब्बल छिन् । छोरीले कम उमेरमै अन्तर्राष्ट्रिय पदक जितेपछि एकदमै खुसी लागेको पिता दिपक गौतमले बताए ।