सर्लाही, ७ साउनसर्लाहीको सदरमुकाम मलंगवामा राजपा नेपाल र नेपाली काँग्रेसका कार्यकर्ताहरुबीच झडप भएको छ ।झडप हुँदा ४ जना घाइते भएका छन् भने ३ को अवस्था गम्भीर छ ।
मलंगवा नगरपालिका-१२ गम्हरियामा रामजानकी मठको पर्खाल निर्माण कार्यमा अनियमितता भएको विषयलाई लिएर राजपा नेपाल र नेपाली काँग्रेसका कार्यकर्ताहरुबीच आइतवार झडप भएको हो ।
झडपमा परेर वडा न -१२ का ४२ वर्षिय लालबाबु राय,२५ वर्षिय संजय राय,२८ वर्षिय योगेन्द्र राय गम्भीर घाइते भएका छन । उनीहरु तीनै जना राजपा नेपालका कार्यकर्ता हुन् । उनीहरुलाई थप उपचारका लागि काठमाडौं पठाइएको छ ।
काँग्रेस कार्यकर्ता रविनन्दन राय यादव पनि घाइते भएकोमा उनको अवस्था सामान्य रहेको बताइएको छ ।
मलंगवा-१२ गम्हरिया वडा कार्यालयको छेउमा रहेको रामजानकी मठमा गत आर्थिक वर्षको विनियोजित बजेटबाट निर्माण भइरहेको पर्खालमा वडा कार्यालयले २ नम्बरी इट्टाको प्रयोग गरिरहेकोले यस्तो नगर्न भन्दै निर्माणको काम रोक्न खोज्दा वडा अध्यक्ष स्वयंको नेतृत्वमा नेपाली काँग्रेसका कार्यकर्ताहरुले आफूहरुमाथि कुटपिट गरेको राजपा नेपालका कार्यकर्ता एव स्थानीयबासी विन्देश्वर यादवले बताए ।
वडा अध्यक्षले भने पर्खाल निउ मात्र भएको भन्दै विवाद पर्खाल निर्माणको विषयलाई लिएर नभइ दुई राजनीतिक दलका कार्यकर्ताहरु बिच चल्दै आएको आपसी विवादका कारण भएको जिकिर गरे ।