रौतहट, २६ साउनराजदेवी नगरपालिका वडा नम्बर ९ मा आर्थिक वर्ष २०७४।२०७५ को ७२ लाख रुपैयाँ फ्रिज भएको छ । राजनीतिक दलको मतभेदको कारण उक्त रकम फ्रिज भएको मधेशवाणीले जनाएको छ ।
शनिबार आयोजित सार्वजानिक सुनुवाई कार्यक्रममा स्थानीयहरुले विकासको लागि आएको रकम कसरी र किन फ्रिज भयो भन्ने प्रश्न गर्दा निर्वाचित वडा अध्यक्ष फुलिंद्र दासले यसको दोषी सबै वडाबासी भएको आरोप लगाए ।
उपभोक्ता गठनमा केही स्थानीय नेताहरुले विरोध गरी निर्णय पुस्तिका च्याती दिएको कारण समयमा योजना कार्यान्वयन हुन नसक्दा रकम फ्रिज भएको वडा अध्यक्ष दासको भनाइ रहेको छ ।
स्थानीयले राखेको जिज्ञासाको समाधान गर्ने क्रममा नगर प्रमुख धीरेन्द्र सिंह उपप्रमुख अंशु सिंहले केहि कमी कमजोरीको कारण रकम फ्रिज हुन गरेको स्वीकार्य गर्दै जनतासित क्षमा मागेका छन् ।
नगरपालिकाका प्रमुख र उपप्रमुखको घर भएको वडाको ७२ लाख ९ सय ८६ रुपैया फ्रिज हुनु लज्जास्पद रहेको छ ।
आपसी विबादको कारण नगरसभावाट छनौट भएको रामकिशुन दासको घर देखि प्रेम शंकरको घर सम्म र ख्याली साहको घरदेखि पंडितजीको घरसम्मको बाटो ढलानको योजनामा कार्य नभई रकम फ्रिज भएको मेयर सिंहले बताएका छन् ।
रकम फ्रिज हुदैन भन्ने विश्वासमा बसेको र पछि रकम फ्रिज हुने जानकारी प्राप्त हुदा समय नजिक हुन गएकोले सीमाक्षेत्र विकासको रकम खर्च गरिए पनि नगरपालिकाले विनियोजन गरेको रकम खर्च हुन नसकेको मेयर सिंहले बताए । उनले आफनै गाउको रकम फ्रिज भएकोमा हीनता बोध भई रहेको जिकिर गरे ।
