भक्तपुर, २८ साउनशिक्षा, विज्ञान तथा प्रविधि मन्त्री गिरीराजमणि पोखरेलको पहलमा ९५ सामुदायिक विद्यालयले प्राविधिक शिक्षा पठन पाठनको स्विकृती् प्राप्त गरेका छन । मन्त्री पोखरेलको अध्यक्षतामा सोमबार बसेको प्राविधिक शिक्षा तथा व्यवसायिक तालीम परिषद् बैठकले विभिन्न जिल्लाका ९५ सामुदायिक विद्यालयमा प्राविधिक शिक्षा पठन पाठनको स्विकृती दिने निर्णय गरेको हो ।
बैठकले विभिन्न ८ जिल्लामा पोलिटेक्निकल इन्स्टिच्युट खोल्ने निर्णयसमेत गरेकोे छ । महोत्तरीको बर्दिबास, चितवनको माडी, स्याङ्जाको वालिङ्, रुकुमको चौरजहारी, सल्यानको खलंगा, बझाङको अटेला, अर्घाखाँचीको चवेक र दाङको घोराहीमा पोलिटेक्निकल इन्स्टिच्युट खोल्ने निर्णय भएको सदस्य सचिव पुष्प रमण वाग्लेले बताए ।
प्राविधिक शिक्षा तथा व्यवसायिक तालिम परिषद्(सीटीइभीटी)को सम्बन्धनको बिषयलाई लिएर मन्त्रीहरु बिबादित भैरहदा पोखरेलको प्राथमिकतामा भने सामुदायिक विद्यालय परेपछि निर्णय बिबादरहित बनेको छ । यस अघि पनि शिक्षा मन्त्रालयको नेतृत्व सम्हालेका मन्त्री पोखरेलले अहिलेसम्म निजीलाई स्वीकृति प्रदान नगरेको बताइएको छ ।
निजी क्षेत्रमा स्वीकृति दिएर प्राविधिक शिक्षालाई महँगो र विपन्नको पहुँचबाट टाढा पुर्याइएको आवाज उठिरहदा आजको निर्णयले सकारात्मक संदेश दिने मन्त्रीका सल्लाहकार जीवन गौतमको जिकिर छ । बेरोजगारीको समस्या हल गर्न प्राविधिक तथा व्यवसायिक शिक्षाको बिकल्प नभएको भन्दै सल्लाहकार गौतमले बिपन्न विद्यार्थीहरुले अझ सजिलै प्राविधिक शिक्षा पढ्न सक्ने बातावरण बनाउन थप पहल गरिने बताए ।