आफ्नै विद्यार्थीमाथि अनैतिक व्यवहार गरेको अभियोग लागेका प्रधानाध्यापक पुर्पक्षको लागि थुनामा परेका छन् । आफैँले अध्यापन गराउने बालिकामाथि अप्राकृति मैथुन गर्ने प्रअ पुर्पक्षका लागि थुनामा परेका हुन् ।

जिल्लाको फलेबास नगरपालिका–६ स्थित माझीगाँउ प्राथमिक विद्यालयका प्रधानाध्यापक खिलप्रसाद पौडेललाई पर्वत जिल्ला अदालतले कारागार चलान गरेको हो । जिल्ला न्यायाधीश दयाराम पोखरेलको इजलासले पुर्पक्षमा राखी अनुसन्धान गर्न आदेश दिएपछि पौडेललाई कारागार चलान गरिएको छ ।

उनले उक्त प्राविमा अध्ययनरत सातदेखि बाह्र वर्ष उमेरका बालिकालाई एक बर्षदखि ललाई फकाई यौनाङ्ग खेलाउन र मुख मैथुन गर्न लगाउने गरेको खुलासा भएको थियो । पिडित ४ बालिकाहरुले घरमा उनको कर्तुतबारे जानकारी गराएपछि साउन ६ गते गाउँलेहरूले प्रअलाई कालो मोसो र जुत्ताको माला लगाई गाउँ घुमाएका थिए ।

कालो मोसो र जुत्ताको माला लगाई गाउँ घुमाएपछि सोहिदिन प्रअ पौडेललाई फलेबासस्थित प्रहरी चौकीमा बुझाइएको थियो । उनको विरुद्धमा परेको मुद्दाको अन्तिम फैसला नहुन्जेल पुर्पक्षमा राखि अनुसन्धान गर्न अदालतले आदेश दिएको हो ।