काठमाडौँ, २९ भदौ गृहमन्त्री रामबहादुर थापा ‘बादल’ले कञ्चनपुरकी निर्मला पन्तको हत्यारा पहिचान हुन नसक्दा सबैभन्दा बढी दु:खी आफू भएको दावी गरेका छन् ।
निर्मलाका आमा र बुवासहितको प्रतिनिधिमण्डलालाई शुक्रबार गृह मन्त्रालयमा भेट्दै गृहमन्त्री थापाले भने,” जत्ति पीडा तपाईहरुलाई छ । त्यो पीडा मलाई पनि छ । जति पीडा गृहलाई हुन्छ, त्यति अरुलाई नहुने रहेछ ।”
निर्मलाको हत्याराको नजिक अनुसन्धान पुगिसकेको जिकिर गर्दै उनले दोषीलाई कठघरामा ल्याई छाड्ने प्रतिवद्धता समेत प्रकट गरे ।
गृहमन्त्री थापाले भने, ‘ कञ्चनपुर घटनामा हामीले सुरुदेखि नै ध्यान दिएका हौ । घटना लगत्तै स्थानिय प्रहरीलाई अनुसन्धान गर्न निर्देशन दियौ, त्यसपछि केन्द्रबाट सिआईबी टोली पठायौं, त्यसले पनि नभएपछि उच्चस्तरीय छानविन समिति गठन गरीएकोछ । समिति बाहेक पनि छुट्टै ढंगले थप अनुसन्धान भईरहेको छ । ’
सो घटनामा जिम्मेवार निकाय तथा व्यक्तिबाट भएका लापरवाहीलाई छुट नदिईने पनि गृहमन्त्रीले स्पष्ट पारे ।
दोषी छिटो पत्ता नलाग्दा परिवारलाई चिन्ता हुनु स्वभाविक भएको भन्दै गृहमन्त्री थापाले दोषी पत्ता लगाउन कुनै कसर बाँकी नराखिएको बिस्वास दिलाउन प्रयास गरे ।
स्वर्गिय निर्मलाका आमा, बुवाले घटना भएको लामो समय बित्दा समेत दोषी पत्ता नलागेको, प्रहरीबाट बिगतमा राम्रो साथ नपाएको गुनासो गर्दै छिटो भन्दा छिटो अपराधी पत्ता लगाउन गृहमन्त्रीलाई आग्रह गरेका थिए ।