राजबिराज, ३ असोजसंघीय समाजवादी फोरम नेपालले यस पटक पनि संविधान दिवस नमनाउने भएको छ । यस अघि आजको दिनलाई कालो दिनको रुपमा मनाउदै आएको फोरमले यसपटक भने कालो दिवस पनि नमनाउने भएको छ ।
संघीय समाजवादी फोरम नेपालका अध्यक्षसमेत रहेका उपप्रधान एवं स्वास्थ्यमन्त्री यादवले आफ्ना पार्टीले संविधान दिवसको दिवस वा, कालो दिवस कुनै पनि नमनाउने खुलासा गरे ।
मंगलबार राजविराजमा आयोजित पत्रकार सम्मेलनमा उपप्रम यादवले सो कुरा बताएका हुन् । उनले संविधान दिवसलाई कालो दिवसका रुपमा नमनाउने बताए ।
अध्यक्षसमेत रहेका उपप्रधान एवं स्वास्थ्यमन्त्री उपेन्द्र यादवले आफूहरुले संविधानको रक्षा गर्ने शपथ लिएकोले कालो दिवस नमनाउने बताएका हुन् ।
यही संविधानअन्तर्गत निर्वाचनहरुमा भाग लिएकोले संविधानको विरोधमा कालो दिवस मनाउन नैतिक आधार नभएको उनको जिकिर छ । मधेसबादी दल राजपाले भने आजको दिनलाई कालो दिवसको रुपमा मनाउने कार्यक्रमलाई निरन्तरता दिएको छ ।