नेत्र बिक्रम चन्द ‘विप्लव’ नेतृत्वको नेकपा निकट पत्रकार संगठनले पार्टीको आदेश अवज्ञा गरेको छ । नेतृत्वको बिषयमा पार्टीले हस्तक्षेप गरि प्रकाश डुम्रेको अध्यक्षतामा क्रान्तिकारी पत्रकार संगठनको घोषणा गरेपछि असन्तुष्ट बनेका ५ पत्रकार नेताहरुलाई पार्टी सदस्य समेत नरहने गरि कारवाही गरिएपछि असन्तुष्ट बनेका बहुमत सदस्यहरुले पार्टीको आदेश अवज्ञा गर्दै पार्टी नेतृत्वलाई चुनौती दिएका छन् ।

क्रान्तिकारी पत्रकार संगठन नेपाल केन्द्रीय समितिको प्रथम पूर्ण बैठकले  ५१ सदस्यीय पदाधिकारी चयन गरेको छ । संगठनको केन्द्रीय अध्यक्षमा डिल्लीराज रावत, उपाध्यक्षमा दिप बहादुर घर्ती र जन्मदेब जैशी, महासचिवमा बाबुराम भुसाल र कोषाध्यक्षमा तिलक अधिकारी सर्वसम्मत चयन भएका छन् । त्यसैगरी प्रदेश संरचनालाई समेत समेट्ने गरी सविचमा बैकुण्ठ गिरी,जीवन हमाल, उन्नती चौधरी, रुपेन्द्र ऐडि, राजेन्द्र अधिकरी, राज कपुर महर्जन, साहश भट्ट, र धनन्जय बुढा चयन भएका नेता कमल बुढाले बताए ।

गत बैशाख १५,१६, र १७ गते सम्पन्न तेस्रो राष्ट्रिय सम्मेलनबाट निर्वाचित कार्यसमितिले पदाधिकारीको बिषयमा टुंगो लगाउन सकेको थिएन । पत्रकारको आन्तरीक बिबाद पार्टीमा प्रवेश गरेपछि पार्टीले नेपाल पत्रकार महासंघका पूर्व सचिव प्रभात चलाउने र बर्तमान केन्द्रिय सदस्य जन्मदेव जैशी लगायत ५ पत्रकारलाई ४ आरोप लगाउदै पार्टीबाट निस्कासन गरेको सार्वजनिक सूचना समेत जारी गरेको थियो ।निस्कासनमा परेका नेताहरुले आरोप प्रमाणित गर्न चुनाैती दिदै आइरहेको बेला बहुमत सदस्य उनीहरुकै पक्षमा उभिएपछि पार्टी नेतृत्व  अप्ठ्यारोमा परेको देखिएको छ ।