धनगढी, १ मंसिरधनगढीमा मृतक एक युवकलाई घिसार्दै लग्दै गरेको अवस्थामा एक जना पक्राउ परेका छन् । पक्राउ पर्नेमा धनगढी उपमहानगरपालिका- ४ का आशिष सेठी रहेका छन् ।
शुक्रबार राती धनगढी उपमहानगरपालिका- ४ स्थित सुदूरपश्चिम प्रदेश प्रमुखको कार्यालय अगाडिको सडकमा मृतक युवकलाई घिसार्दै लगेको अवस्थामा गस्तीमा रहेको प्रहरी टोलीले उनलाई पक्राउ गरेको जानकारी प्राप्त भएको छ ।
वडा नम्वर ४ कै २५ वर्षीय विजय थापालाई मृत अवस्थामा घिसार्दै लग्दै गरेको बेला सोही ठाउँका आशिष सेठीलाई पक्राउ गरिएको जिल्ला प्रहरी कार्यालय कैलालीका प्रहरी प्रवक्ता एंव प्रहरी नायव उपरीक्षक हरिबहादुर ओलीले जानकारी दिए ।
मृतक थापा रक्ताम्य अवस्थामा थिए । उनको कसरी मृत्यु भएको हो भन्ने बारे खुल्ने क्रममा रहेको प्रहरीले जनाएको छ ।
प्रहरीले शनिबार मुचुल्का उठाएको छ । घटनाबारे थप अनुसन्धान भइरहेको प्रवक्ता ओलीले बताए ।