जनकपुर, १२ मंसिरप्रदेश नम्बर २ का मुख्यमन्त्री मो.लालबाबु राउत गद्दीले शिक्षा नीति बनाउने अधिकार प्रदेश सरकारलाई हुनु पर्ने बताएका छन् । उनले प्रदेशको शिक्षा नीति प्रदेशले नै बनाउन पाउनुपर्ने बताएका हुन् ।
सुझाव संकलन गर्न बुधवार जनकपुर पुगेको उच्च स्तरीय राष्ट्रिय शिक्षा आयोगसामु उनले यस्तो धारणा राखेका हुन् । आयोगले आयोजना गरेको कार्यक्रमलाई सम्बोधन गर्दै मुख्यमन्त्री राउतले भने, ”प्रदेश भित्रको शिक्षामा एकरुपता ल्याउन समेत प्रदेशको शिक्षा नीति प्रदेशले बनाउन पाउनुपर्छ ।”
केन्द्रिय तहबाट भएको विभेदको कारण मधेशको शिक्षा स्तर खस्किएको जिकिर गर्दै उनले संविधानले दिएको अधिकार बाट बन्चित गर्दै केन्द्रिय शिक्षा नीति नलाद्न समेत सुझाव दिए ।
आयोगका सदस्य डा. विद्यानाथ कोइरालाको अध्यक्षतामा भएको उक्त कार्यक्रममा मुख्यमन्त्री राउतले भने, ” यस्तो शिक्षा नीति बनाउनुस कि प्रदेशले सजिलै स्वीकार गरोस ।”
उक्त कार्यक्रममा सामाजिक विकासमन्त्री नवलकिशोर साह, राज्यमन्त्री अभिराम शर्मा, प्रदेश सभा सदस्य परमेश्वर साह, जनकपुर उपमहानगरपालिकाकी उपप्रमुख रिता झा लयायत रहेका थिए ।