महोत्तरी जिल्लामा भारतीय कम्पनीको ‘दो फूल’ नामक खाने तेल बिक्री वितरणमा रोक लगाइएको छ । उक्त खाने तेल खान अयोग्य भएको ठहर गर्दै बिक्री वितरणमा रोक लगाइएको हो ।

जिल्लामा छ्याप्छ्याप्ती पाइने उक्त ब्रान्डको खाने तेलको बारेमा पटक पटक गुनासो आएपछि जिल्ला प्रशासन कार्यालयले हेटौँडास्थित खाद्य प्रविधि तथा गुण नियन्त्रण क्षेत्रीय कार्यालयसंग समन्वय गरि नमूना परिक्षण गरिएको थियो । जलेश्वरस्थित तीन वटा पसल बाट तेलको नमूना लिएर गएको कार्यालयले गुणस्तर नभएको रिपोर्ट दिएपछि उक्त तेललाई बन्देज गरिएको हो ।

प्रमुख जिल्ला अधिकारी उमेशकुमार ढकालको अध्यक्षतामा बसेको सर्वपक्षीय बैठकले स्वास्थ्यमा प्रतिकूल असर पार्ने देखिएको उक्त तेलको बिक्री बितरणमा आइतबारबाट बन्देज लगाएको हो । त्यसैगरी उक्त बैठकले ठूलो आवाजमा डिजे बाजा बजाउन बन्देज गर्ने लगायतको निर्णय समेत गरेको बताइएको छ ।