भक्तपुर, २९ माघ । नेपाल सरकारका उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादवकी बुहारीको निधन भएको छ । संघीय समाजवादी फोरम नेपालले प्रेस विज्ञप्ति जारी गर्दै मनिषा यादवको मृत्यु भएको जनाएको हो ।
लामो समयदेखि बोन क्यान्सरबाट पीडित मनिषा यादवको भक्तपुरमा रहेको क्यान्सर अस्पतालमा मंगलबार निधन भएको हो ।
दिल्लीस्थित एम्स अस्पतालमा डेढ वर्षसम्म उपचार गराउँदा पनि ठिक नभएपछि मनिषालाई आठ महिना अघि नेपाल ल्याइएको थियो । त्यहाँका डाक्टरले मनिषा लामो समयसम्म बाँच्न नसक्ने भनेका थिए ।
काठमाडौंमा उनलाई घरमै राखेर उपचार गरिँदै आएकोमा ६ दिनअघि रोगले च्यापेपछि मनिषालाई भक्तपुरस्थित क्यान्सर अस्पतालमा भर्ना गरिएको थियो ।
संघीय समाजवादी फोरम नेपालका अध्यक्षसमेत रहेका यादवका छोरा अमरेन्द्र यादव र मनिषाको २०७२ वैशाख २९ गते विवाह भएको थियो । उनीहरुको दुई वर्षकी छोरी छिन् ।