गुल्मी, ७ साउन गुल्मीको सत्यवती गाउँपालिकामा भीषण पहिरो गएको छ । पहिरोमा परी पाँच जनाको मृत्यु भएको छ भने १२ जना वेपत्ता भएका छन् ।
सत्यवती गाउँपालिका वार्ड नं. ३ मा उक्त पहिरो गएको हो । पहिरोमा परेका दुई जनाको उद्धार गरिएको छ । गए राति खसेको पहिरोले घर भत्काउँदा यति ठूलो मानवीय क्षति भएको हो ।
सत्यवती गाउँपालिकाकै वडा नम्बर – ४ लिंघाको भिरकुनामा पनि चार वटा घर पहिरोले पुरेको छ । सत्यवती गाउँपालिका अध्यक्ष पारिश्वर ढकालले पहिरो गएको क्षेत्रमा प्रहरी र स्थानीय लागेर उद्धारको काम भइरहेको जानकारी दिए । उद्धार गरिएका घाइतेहरुलाइ पानी परिरहेकाले बाटो अवरुद्ध हुँदा उपचारमा लैजानका लागि समस्या परेको छ।
पहिरोमा पुरिएर वडा नम्बर-३ का ३२ वर्षीय तिलकुमारी त्रामु, ९ वर्षीय दर्शन त्रामुको मृत्यु भएको छ भने वडा नम्बर – ४ का ६५ वर्षीय छल्लली बिक, १२ वर्षीय अञ्जली बिक, १० वर्षीय हेमन्त बिकको मृत्यु भएको गुल्मी प्रहरीले जनाएको छ ।
भारी वर्षापछि आएको बाढी र पहिरोले देशभरको जनजीवन प्रभावित पारेको छ । कतै सडक अवरुद्ध भएका छन् भने कतै पहिरो र बाढीको समस्या बढेको छ । गुल्मीका रिडी रुद्रबेनी र वामी टक्टर सडकखण्ड अवरुद्ध भएकाले प्रभावित ठाउँमा पुग्न समस्या भएको प्रहरीले जनाएको छ ।
अपडेट : पहिरोमा पुरिएर मृत्यु हुनेको संख्या १० पुगेको छ । २ जना अझैँ बेपत्ता छन् ।
सत्यवति गाउँपालिकाको लिम्घामा ८ जना र ठूलो लुम्पेकमा २ जनाको मृत्यु भएको हो ।
मृत्यु हुनेहरुमा एकै घरका ६५ वर्षीय छल्ली बिक, २८ वर्षीय पम्फा बिक, १२ वर्षीय अंजली बिक, १० वर्षीय हेमन्त बिक, रुपा बिक, सिवानी बिक, निर्मला बिक, हिमान्सु बिक रहेका छन् ।
ठूलो लुम्पेक कसिन डाँडा पहिरोमा पुरिएर आमा छोरा ३२ वर्षीय तिलकुमारी त्रामु र ९ वर्षीय दर्शन त्रामुले ज्यान गुमाएका छन् ।