लमजुङ, ८ साउन । लमजुङको दोर्दी खोलामा भीषण बाढी आउँदा ठूलो धनजनको क्षति भएको छ । बुधवार दिउसो ४ बजेतिर आएको बाढीले बगाउँदा ३ जनाको मृत्यु भएको छ भने केहि बेपत्ता बनेका छन् ।
बाढी आउँदा भागेर ज्यान जोगाएका मजदुर अमर बस्नेतले बज्रगुरु जलविद्युत आयोजनाको इनलेटमा रहेका १६ जना मजदुरलाई बाढीले बगाएको जानकारी दिएका छन । बाढीमा बगेका अधिकांश मजदुरहरु राति ड्यूटी गरेर दिउसो सुतेका थिए भने कोही बासस्थानमा बसेका थिए । एकाएक बाढी आएपछि उनीहरु भाग्न नपाएर बगेको बस्नेतले बताए ।
त्यसैगरी लमजुङको सबैभन्दा उच्च स्थानमा रहेको ५४ मेगावाटको जलविद्युत आयोजना सुपर दाेर्दीमा २८ जना मजदुरहरु सुरुङभित्रै थुनिएका छन् । एकाएक बाढीको पानी सुरुङभित्र पसेपछि उनीहरु भित्रै थुनिएका हुन् । अहिले उनीहरुको भित्र अवस्था के छ भन्ने पत्ता लगाउने काम भइरहेको छ ।
बाढीले सोही खोलामा बन्दै गरेको लिबर्टी हाइड्रोका ठूला ठूला मेशिनहरु समेत बगाएको छ । निर्माणाधीन लिबर्टी हाइड्रोका निकै वजनदार मेशिनहरु बाहिरै राखिएका थिए । बाढीले खोलाबाट ३५ मिटरसम्म उचाइमा राखिएका सामानहरु समेत सबै बगाएको छ ।
अहिले सो क्षेत्रमा नेपाली सेना, नेपाल प्रहरी र स्थानीयले उद्धारको प्रयास गरिरहेका छन् ।