गोरखा, ९ साउन । नेपालमा टनका टन सुन तस्करी हुने गरेको चर्चा बजारमा छाइरहँदा गोरखामा अपत्यारिलो गरी लुकाइएको ठूलो मात्रामा सुन भेटिएको छ ।
उत्तरी गोरखाको धार्चे गाउँपालिकाको खोर्लाबेसीमा लुकाई राखेको अवस्थामा अन्दाजी १५ /१६ किलो सुन भेटिएको हो । उक्त सुन कतै व्यवस्थित गरेर घरमा लुकाइएको अवस्थामा भेटिएको होइन । खोर्लाबेसीको एक ओढारमा लुकाएर राखिएको अवस्थामा उक्त सुन भेटिएको हो ।
जिल्ला प्रहरी कार्यालयले उक्त सुनसहित एक जना व्यक्तिलाई पनि पक्राउ गरेको जनाएको छ । यद्यपी सुन बाहिर आए जस्तो परिमाणमा नभएको प्रहरीको भनाइ छ ।
उत्तरी गोरखाबाट प्रहरीले उक्त सुनसहित पक्राउ परेका व्यक्तिलाई सदरमुकामतिर ल्याउँदै गरेको जनाएको छ । त्यो सुन कहाँबाट कसरी उत्तरी गोरखामा पुगेको हो भन्ने केही थाहा हुन सकेको छैन । प्रहरीले त्यसका बारेमा अध्ययन भइरहेको जनाएको छ । थप विवरण आउँन बाकी छ ।