बेरोजगारलाई खुशीको खवर छ । सरकारले ९ सय कर्मचारी भर्ना गर्ने तयारी गरेको छ ।

सरकारले विभिन्न सरकारी आयोजना र कार्यालयका लागि स्थायी, अस्थायी र करार गरी करीब ९ सय कर्मचारी भर्ना गर्ने तयारी गरेको हो ।

सरकारले नयाँ दरबन्दी सिर्जना गरेर कर्मचारी नियुक्त गर्ने तयारी गरेको सरकारका प्रवक्ता तथा सञ्चारमन्त्री गोकुल बाँस्कोटाले जानकारी दिएका हुन् ।

विभिन्न मन्त्रालयअन्तर्गतका आयोजना तथा कार्यक्रमका लागि ८ सय ९३ पद सिर्जना गरेको उनको भनाइ छ । मन्त्री परिषद्को बैठकले राजपत्रांकित स्थायी ८ सय ५३ पद, राजपत्रांकित अस्थायी १५ पद र सेवा केन्द्रका लागि २५ अस्थायी पदको दरबन्दी स्वीकृत गरेको प्रवक्ता बाँस्कोटाले बताए ।

स्वीकृत दरबन्दीमध्ये सबैभन्दा बढी जलस्रोत तथा सिँचाई विभाग अन्तर्गत ३ सय ६० र कृषि तथा पशुपंक्षी विकास मन्त्रालय अन्तर्गतका आयोजनाका लागि २ सय ७२ रहेको छ ।

नयाँ सिर्जना गरिएका पदमा राजपत्रांकित पद (अधिकृत स्तर) को दरबन्दी ८ सय ५३ रहेको छ ।

लोकसेवा आयोग लाई बाइपास गरी नयाँ दरबन्दी सिर्जना गरिनु गलत भएको आयोगको भनाइ भएपनि सरकारले आयोजनाको उदेश्य अनुरुप काम गर्न सक्ने दक्ष जनशक्तिका लागि नयाँ दरबन्दी स्वीकृत गर्नुपरेको जिकिर गरेको छ ।